ءدارى-دارمەكسىز اسقازان جۇمىسىن جاقسارتۋدىڭ جولى

استانا. قازاقپارات - اسقازان- ىشەك جولدارىنىڭ ءبىزدىڭ ومىرىمىزدەگى ماڭىزدىلىعىن سوزبەن ايتىپ جەتكىزۋ قيىن.

الدىمەن تاماقتانۋ، سونان كەيىن ءسىڭدىرۋ، ارتىنان دارۋمەندەردى جانە پايدالى زاتتاردى توكسيندەردەن ءبولىپ الۋ... جانە كۇن سايىن وسىلاي. وكىنىشكە وراي، ءبىزدىڭ قوعامدى فاست- فۋد، كوكا-كولا سىندى تاعامدار جاۋلاپ الدى.

ال بۇل اسقازان ءۇشىن ادام ايتقىسىز اۋىرلىق اكەلەدى. سوندىقتان بولار، اسقازان- ىشەك جولدارىنىڭ قيىندىقتارىنان زارداپ شەگىپ، دارىگەر كومەگىنە سۇيەنەتىندەردىڭ قاتارى كۇن وتكەن سايىن ارتىپ كەلەدى. بۇگىندە عىلىمدا ونعا جۋىق اسقازان-ىشەك اۋرۋى بەلگىلى بولعان. عالىمداردىڭ ايتۋىنشا، ادام جۇيەسى مەن باسقا اعزالارى اسقازاننىڭ جاعدايىمەن تىعىز بايلانىستى ەكەن. دۇرىس جۇمىس ىستەيتىن اسقازان ادەمى تەرى، دەنى ساۋ شاش، بەلسەندى زات الماسۋدىڭ كەپىلى.

وقىرماندارىمىزدىڭ اراسىندا دا مايلى نەمەسە تەز دايىندالاتىن تاعامداردى ءجيى پايدالانىپ، اسقازان- ىشەك جولدارى اۋرۋلارىنا تاپ بولىپ جۇرگەندەر بار بولار. ەندەشە، پايدالى كەڭەستەر لەگى ءسىز ءۇشىن. اسقازانعا قالاي كومەكتەسەمىز؟ قانداي ەرەجەلەردى ۇستانۋ كەرەك؟ ءىش قاتۋ، ءىشتىڭ كەبۋى سىندى ىشەك ايماقتارىنداعى جاعىمسىز سەزىمدەردىڭ الدىن الۋعا بولا ما؟

ءبىرىنشى كەزەكتە اسقازان-ىشەك جولدارىنىڭ بەلسەندىلىگى ءبىزدىڭ جەگەن تاعامىمىزبەن تىعىز بايلانىستى ەكەنىن ءبىلىڭىز. سوندىقتان، ءاربىر ادامنىڭ كۇندەلىكتى راتسيونى پايدالى تاعامداردان قۇرالۋى كەرەك. فاست- فۋد، جارتىلاي فابريكات سىندى «اسقازان جاۋلارىن» راتسيوننان ءوشىرىپ تاستاۋعا تىرىسىڭىز.

سالاۋاتتى ءومىر سالتىنا كوشەيىك. جۇمىس كۇندەرىڭىز قالاي وتەدى؟ كەڭسەدە وتىراسىز با، الدە قيمىل ۇستىندە بولاسىز با؟ بالكىم، مۇلدە جۇمىس ىستەمەيتىن شىعارسىز. ءۇي جاعدايىندا جۇمىس ىستەيتىندار بار شىعار؟ اسقازانىڭىزعا ارىز ايتساڭىز، ءومىرىڭىز بەلسەندى ەمەس دەگەن ءسوز. اس قورىتۋ جۇمىسىن جاقسارتقىڭىز كەلسە، كۇنىنە تىم بولماعاندا 4-5 شاقىرىم جاياۋ ءجۇرىڭىز.

دارىگەرلەر اسقازاننىڭ بەلسەندى جۇمىس ىستەۋى ءۇشىن گازدالماعان سۋدى كوپ ىشۋگە كەڭەس بەرەدى. ءبىز ىشەتىن تاعامدار ءارتۇرلى قورىتىلادى: ءبىر تاعام 30 مينۋت قورىتىلسا، ەكىنشىسىنە 5-7 ساعات كەرەك. ۇزاق قورىتىلاتىندارعا ەت، ساڭىراۋقۇلاق جانە قۇرامىندا جاسۇنىق بار تاعامدار ەنەدى. ال ءجيى ىشىلگەن سۋ بۇل تاعامداردىڭ تەز سىڭۋىنە جول اشادى.

ءۇي جاتتىعۋلارى مەن جاتتىعۋ زالدارى اسقازان «موتورىنا» جاقسى جاعىنان اسەر ەتەدى. سول سەبەپتى، بۇگىنگى راتسيونىڭىز قيىن قورىتىلاتىن تاعامدارعا تولى بولسا، جاتتىعۋ زالىنا قاراي اسىعىڭىز. بۇل ءادىس تاعامنىڭ ۇزاق ۋاقىت اسقازاندا تۇراقتاپ قالۋىنا كەدەرگى بولادى.

اعزاڭىزدى دۇرىس جۇمىس ىستەتۋگە تىرىسىڭىز. كۇن سايىن بەلگىلەنگەن ءبىر ۋاقىتتا تاماقتانىپ (ءجيى ءارى ازدان)، اجەتحاناعا تۇراقتى تۇردە كىرىڭىز. رەتتىلىك دەگەن شكافتا عانا ەمەس، باستا دا، اسقازان-ىشەك جولدارىندا بولسىن. اسقازان تاعامدى ىلعي ءبىر ۋاقىتتا قابىلداۋدى ۇيرەنسە، قيىندىقتار ءسىزدى اينالىپ ءوتىپ، ءىش قاتۋ نەمەسە ءىشتىڭ كەبۋى دەگەندى بىلمەيتىن بولاسىز.

تاماق جەپ وتىرىپ سويلەۋدەن اۋلاق بولىڭىز. ءجۇرىپ بارا جاتىپ تاماق جەمەڭىز. كومپيۋتەر نە تەلەديدار الدىندا تاماق جەۋگە بولمايدى. كۇندە تاڭەرتەڭ ساعات ءتىلى بويىنشا 10-15 مينۋت بويى ءىشىڭىزدى ۋقالاڭىز. قىشقىل ءسۇتتى ونىمدەر مەن كوكونىستەردى، جەمىستەردى بارىنشا كوپ پايدالانۋعا تىرىسىڭىز. بۇل ونىمدەر تەز قورىتىلىپ قانا قويماي، قۇرامىنداعى دارۋمەندەرى جانە پايدالى زاتتارى سىزگە ەنەرگيا، كوتەرىڭكى كوڭىل-كۇي سىيلايدى.

سوڭىندا مىناداي ءتىزىم جاسادىق:

اسقازانعا «ۇنايتىن» تاعامدار: قايماق، وسىمدىك مايى، جۇمىرتقا سارىسى، تمين، فەنحەل، ءسابىز، قىزىلشا، اۆوكادو، قۇرعاق جەمىستەر، كوكونىستەر (مىسالى، الما، قاربىز، قاۋىن، ورىك، قارا ورىك، جەمىستەر، ءارتۇرلى بوتقالار، كەبەك، يوگۋرت، ايران، كەپتىرىلگەن ورىك، ءىنجىر ت. ب.)

اسقازانعا «ۇنامايتىن» تاعامدار: المۇرت، ايۆا قايناتپالارى، كيسەل، قارا ءشاي، كاكاو، اۋىز قۋىراتىن شاراپ، كونسەرۆىلەر، فاست- فۋد، گازدالعان سۋسىندار، ورامجاپىراق، تىم اشى، تىم ءتاتتى تاعامدار، ساعىز، جاسىل بالگار بۇرىشى، پياز بەن سارىمساق، پىسپەگەن باناندار، كراحمالدى ونىمدەر (كارتوپ، كۇرىش، قاراقۇمىق، ماكارون، بالىشتەر، پەچەنە ت. ب). سونداي-اق، بالىقتى، ەتتى، سۇزبەنى، جۇمىرتقانى ابايلاپ جەۋ كەرەك.

ءوزىڭىز بايقاعانداي، اسقازانعا اسا كوپ نارسە قاجەت ەمەس. راتسيوندى پايدالى تاعامدارعا تولتىرۋ، ازداپ سپورت جاتتىعۋلارىن قوسۋ، جاعىمسىز ادەتتەردەن ارىلۋ - اسقازان دا، ءسىز دە ريزاسىز!