ديماش قۇدايبەرگەن اتا-اناسىنىڭ كۇمىس تويىنا ەرەكشە توسىن-سىي جاسادى

 استانا. قازاقپارات - بيىل ديماش قۇدايبەرگەننىڭ وتباسىندا قوس قۋانىش. ءانشىنى تاربيەلەپ، وسىرگەن اتا-اجەسى التىن، ال جارىق دۇنيە سىيلاعان اتا-اناسى كۇمىس تويىن تويلاۋدا.

وسى ورايدا ديماش اتا-اناسىنا ەرەكشە سىي جاساعان. بۇل تۋرالى قانات جانە سۆەتا ايتبايەۆتار 31- ارنانىڭ «ايتا بەرسىن» باعدارلاماسىندا ايتتى.

«سۆەتا ەكەۋمىزدىڭ شاڭىراق كوتەرگەنىمىزگە 25 جىل بولدى. جاقسى ءسوز جارىم ىرىس دەيدى. اتا-انامىز ۇيلەنگەن كەزدە اكەمنىڭ جاقىن دوستارىنىڭ ءبىرى: «قۇدايبەرگەن-ميۋا، سىزدەردىڭ التىن تويلارىڭىزدى بالالارىڭىزدىڭ كۇمىس تويىمەن بىرگە تويلايىق»، - دەپ تىلەك جازعان ەكەن. سول تىلەككە جەتتىك. بيىل اتا-انامىزدىڭ التىن تويىنا ءبىزدىڭ كۇمىس تويىمىز سايكەس كەلىپ تۇر»، - دەپ قۋانىشىمەن ءبولىستى قانات ايتبايەۆ.

ال اناسى مەرەيلى كۇنگە وراي تۇڭعىشى ديماشتىڭ جاساعان سىيى جايلى ءسوز ەتتى.

«ديماش كەزىندە قانات ماعان ارناپ جازعان ءاندى جاڭادان وڭدەپ، قايتا جازدىرىپ، بىزگە توسىن-سىي جاسادى. كەزىندە قانات ماعان ارناپ جازعان. ءسوزى دە، ءانى دە وزىنىكى. مەن ءبىر جاققا كەتىپ قالعان بولۋىم كەرەك»، - دەپ كۇلدى سۆەتا ايتبايەۆا.

«ءيا، «ساعىندىم» دەگەن ءان. ءان دەگەن ءوزى كوڭىل-كۇيدىڭ كورىنىسى عوي. مەن ءوزى ارنايى وتىرىپ، ءان جازاتىن ادام ەمەسپىن. سازگەر ەمەسپىن، كوڭىل-كۇيگە سايكەس ءارتۇرلى اۋەندەردىڭ كەلەتىنى بەلگىلى. شىنىندا دا، مۇڭايىپ، ساعىنىپ وتىرعان كەزدە جازعان ءانىم. ديماش ارنايى ءبىزدىڭ كۇمىس تويىمىزعا وراي جاڭادان وڭدەپ، جارىققا شىعاردى»، - دەپ جارىنىڭ ءسوزىن جالعادى قانات ايتبايەۆ.