ەكسپو اۋماعىندا ءبىر جىلدا قانداي شارالار وتكىزىلدى؟
تۋرا ءبىر جىل بۇرىن - 2017-جىلدىڭ 10- قىركۇيەگىندە استانادا حالىقارالىق مامانداندىرىلعان «ەكسپو-2017» كورمەسى جابىلعان بولاتىن.
حالىقارالىق كورمەلەر بيۋروسى بۇل اۋقىمدى شاراعا تاريحتاعى ەڭ ءساتتى مامانداندىرىلعان كورمە دەگەن باعا بەردى. ەكسپو-2017 كورمەسىنىڭ ارقاسىندا قازاقستان ەكونوميكاسىنداعى بارلىق سالا دەرلىك سەرپىن الىپ، تۋريزم سالاسىنداعى ءوسىم 78 پايىزدى كورسەتتى.
ەكسپو-2017 كورمەسىنىڭ جابىلۋ سالتاناتىندا مەملەكەت باسشىسى «كورمە اياقتالعانمەن، ودان قالعان نىساندار ەل يگىلىگى ءۇشىن جۇمىس ىستەۋ كەرەك» دەگەن تاپسىرما بەرگەن بولاتىن. كورمەنىڭ باستى سيمۆولى «نۇر الەم» سفەراسى كورمە اياقتالسا دا، جۇمىسىن توقتاتپاعان. قازىر سفەرا جاي عانا «بولاشاقتىڭ» مۋزەيى ەمەس، كۇن سايىن مىڭداعان ادام باراتىن ءبىرتۇتاس عىلىمي-ءبىلىم بەرۋ ورتالىعى دەۋگە بولادى.
«ءبىز كەلگەن ادامدارعا بارىنشا قىزىقتى بولۋ ءۇشىن «نۇر الەم» سفەراسىنىڭ كونتەنتىن ۇنەمى جاڭارتىپ وتىرامىز. ادەتتەگى ينستاللياتسيالاردان باسقا، ءبىز الەمدىك دەڭگەيدەگى اتاقتى ينتەراكتيۆتى شوۋ-جوبالاردى دا ىنتىماقتاستىققا شاقىرىپ وتىرمىز»، - دەپ حابارلادى ەربول شورمانوۆ.
ال، جاقىن ارادا ەكسپو الاڭىندا «استانا» حالىقارالىق قارجى ورتالىعى، حالىقارالىق «جاسىل تەحنولوگيالار مەن ينۆەستيتسيالىق جوبالار» ورتالىعى، «Astana Hub» حالىقارالىق IT- ستارتاپتار تەحنوپاركى، IT- ۋنيۆەرسيتەت پەن بيزنەس-ورتالىق جۇمىسىن باستايدى.
سونداي-اق، كوپ فۋنكتسيونالدى «كونگرەسس-ورتالىق» تا قارقىندى جۇمىس ىستەپ تۇر. بۇل جەردە استانا ەكونوميكالىق فورۋمى، دۇنيەجۇزىلىك تاۋ كونگرەسى سياقتى حالىقارالىق جانە رەسپۋبليكالىق شارالار، وتاندىق جانە شەتەلدىك جۇلدىزداردىڭ كونسەرتى ءوتىپ تۇرادى.
ال، لوگيستيكالىق ورتالىق قايتا قۇراستىرۋدان وتكەننەن كەيىن اۋماعى 21 مىڭ شارشى مەتردى قۇرايتىن حالىقارالىق كورمە ورتالىعى جوباسىن جۇزەگە اسىرۋ كوزدەلگەن. بۇل ورىندا دا ەڭ ءىرى حالىقارالىق كورمەلەر وتەدى.