ەكس-اكىم يسەكەشەۆ حالىق ەسىندە قانداي ىستەرىمەن قالدى؟
ەسكە سالا كەتسەك، ق ر پرەزيدەنتى نۇرسۇلتان نازاربايەۆتىڭ جارلىعىمەن اسەت ورەنتاي ۇلى يسەكەشەۆ 2016-جىلى 21- ماۋسىمدا استانا قالاسىنىڭ اكىمى قىزمەتىنە تاعايىندالعان بولاتىن.
سونىمەن حالىق ەسىندە قالعان، قوعام تالقىلاۋىنا ءجيى تۇسكەن اسەت يسەكەشەۆتىڭ تىكەلەي قاتىسۋىمەن شەشىلگەن ماسەلەلەردى تىزبەكتەسەك:
ەڭ الدىمەن، اسەت يسەكەشەۆ قالانى باسقارىپ تۇرعان كەزەڭدە ەلوردادا ءۇش ايعا سوزىلعان «ەكسپو-2017» حالىقارالىق مامانداندىرىلعان كورمەسى وتكەنىن اتاپ ءوتۋ قاجەت. تورتكۇل دۇنيە نازارى استاناعا اۋعان شاقتا ەلوردا ەلدى ۇياتقا قالدىرمادى. ءىرى حالىقارالىق شارانى ابىرويمەن وتكىزۋدە اسەت يسەكەشەۆتىڭ دە ەڭبەگى زور.
استانا قالاسى تۇرعىندارىنىڭ نەگىزگى پروبلەمالارىنىڭ ءبىرى - وت جاعۋ مەرزىمى باستالعاندا، جەل بولماعان كۇندەرى اسەم قالانى كوك ءتۇتىننىڭ باسۋى. اتالعان ماسەلە جىل سايىن قوعام نازارىنا ىلىگەدى. ماسەلەنى تۇبەگەيلى شەشۋ جولىندا قالا باسشىسى بەيجىڭنىڭ اتموسفەرانى تازارتۋ باعىتىندا اتقارىلعان جۇمىستارىن ءوز تاجىريبەمىزدە قولدانۋعا قىزىعۋشىلىق تانىتقان ەدى. دەگەنمەن قالا اكىمى بۇل از ۋاقىتتىڭ ىشىندە شەشىلەتىن پروبلەما ەمەس دەگەن بولاتىن.
يسەكەشەۆتىڭ يگى ىستەرىنىڭ ءبىرى - قالاداعى ءجونسىز ورنالاسقان ساۋدا نۇكتەلەرىن رەتتەۋ مەن قالالىق ۆوكزال ماڭىنداعى بەيبەرەكەتسىزدىك. ويتكەنى، ەسكى ۆوكزال ماڭىنداعى اۆتوتۇراقتىڭ بولماۋى قولايسىزدىق تۋدىراتىن، سونداي-اق حالىق اراسىندا سول ماڭاي جەڭىل جۇرىستىلەردىڭ مەكەنى دەگەن قاۋەسەت ءجيى ايتىلعان. وسى سۇراق قالا اكىمىنىڭ قاتاڭ باقىلاۋىنا الىنىپ، پاترۋلدىك پوليتسيا كەزەكشىلىگى قويىلدى.
ەلوردا اكىمى سونىمەن قاتار شەنەۋنىكتەر سانىن قىسقارتتى. 2017-جىلى قالالىق اكىمدىكتەگى 26 قۇرىلىمدىق بولىمشە 17 گە دەيىن قىسقارتىلدى. تيىسىنشە، باسشىلىق قۇرام سانى دا ازايدى. ەسەسىنە ەنەرگەتيك، جولشى، قۇرىلىسشى سىندى ماماندار ۇلعايتىلىپ، ولاردىڭ سانى 80 پايىزعا دەيىن كوبەيدى.
اسەت يسەكەشەۆتىڭ باسشىلىعىمەن جۇزەگە اسىرىلعان قوعامدىق ماڭىزى بار جاڭاشىلدىقتىڭ ءبىرى - «سەرگەك» كامەراسىن ورناتۋ. اتالعان شارا ءوز ناتيجەسىن دە بەرىپ جاتىر، ياعني «سەرگەك» - ءتىڭ سەرگەكتىگىنىڭ ارقاسىندا ورتا ەسەپپەن قىلمىستى - 30 پايىزعا، ال جول-كولىك وقيعالارىن 18 پايىزعا تومەندەتۋ مۇمكىن بولدى. بۇگىندە «سەرگەك» كامەرالارى 2 مىڭعا جۋىق اكىمشىلىك قۇقىق بۇزۋشىلىقتى اشۋعا مۇمكىندىك بەردى جانە ونىڭ كومەگىمەن 14 ميلليون تەڭگە ايىپپۇل سالىنعان.
ۇستىمىزدەگى جىلدىڭ شىلدە ايىنان باستاپ ەلورداداعى قوعامدىق كولىكتەردە سارالانعان جاڭا تاريف ەنگىزىلدى، بۇل تۋرالى ەلوردالىقتار ءالى كۇنگە دەيىن قىزۋ تالقىلاپ، ءتۇرلى پىكىرلەر ايتىلىپ جاتىر. وسى تۇرعىدا ءا. يسەكەشەۆ اتالعان جاڭا جوباعا جاۋاپتى استانا LRT جۇمىسىنا: «ۆاليداتورلار تۇراقتى جۇمىس ىستەمەسە، جولاۋشىلاردى تەگىن تاسىڭدار»، - دەگەن بولاتىن.
باس قالانىڭ تىنىشتىعىن ساقتاۋ جولىندا يسەكەشەۆ «iKomek» مونيتورينگ جانە جەدەل ارەكەت ەتۋ قالالىق ورتالىعىن ىسكە قوستى. «iKomek» مونيتورينگ جانە جەدەل ارەكەت ەتۋ قالالىق ورتالىعى جەدەل ماسەلەلەردى شەشۋدە ماڭىزدى ءرول اتقارادى.
بۇگىندە ت ك ش سالاسىنداعى بارلىق سۇراقتار بىرىكتىرىلدى (ەلەكتر جانە سۋمەن جابدىقتاۋ، پيك، ليفت كومپانيالارى، قوعامدىق كولىك جانە ت. ب.). ەندى 112 شۇعىل دەن قويۋ ورتالىعى قۇرىلۋدا، كەلەشەكتە ولار ا ق ش پەن كاناداداعى «911» سياقتى جۇمىس جاساۋى ءتيىس. قوسىلۋ 101، 102، 103 نومىرلەرىنەن باستالادى. بۇل وسى نومىرلەر ءتيىستى قىزمەتتەردىڭ جەدەل ارەكەت ەتۋىن قامتاماسىز ەتەدى.
اسەت يسەكەشەۆتىڭ قالا باسشىلىعىنان كەتەر الدىنداعى ەنگىزگەن تاعى ءبىر جاڭالىقتارىنىڭ ءبىرى - قىزمەتتىك كولىكتى تاكسيگە اۋىستىرۋ. استانا اكىمدىگى بيىل تاكسي قولدانۋ بويىنشا پيلوتتىق جوبانى ىسكە قوسقان بولاتىن. وسى جىلدىڭ قىركۇيەك ايىندا قالا اكىمدىگى قىزمەتتىك كولىكتەردەن باس تارتىپ، تاكسيگە كوشتى.
بۇل اسەت يسەكەشەۆ استانا قالاسىنىڭ اكىمى لاۋازىمىندا بولعان ەكى جىلدا اتقارىلعان جۇمىستاردىڭ ءبىر پاراسى عانا. ەستەرىڭىزگە سالا كەتسەك، كەشە ول ەلباسىنىڭ جارلىعىمەن ق ر پرەزيدەنتى اكىمشىلىگىنىڭ باسشىسى بولىپ تاعايىندالدى. ال ەلوردا باسشىسى قىزمەتىنە بۇگىن باقىت سۇلتانوۆ كىرىسكەن بولاتىن.
اۆتور: داۋلەت ىزتىلەۋ