سەمەيدە «رۋحاني جاڭعىرۋ» جوبالىق كەڭسەسى اشىلدى

سەمەي. قازاقپارات - سەمەيدەگى شاكارىم ۋنيۆەرسيتەتىندە «رۋحاني جاڭعىرۋ» جوبالىق كەڭسەسى اشىلدى، دەپ حابارلايدى قازاقپارات.

مۇندا ەلباسى باعدارلاماسىنىڭ جۇزەگە اسۋىن ۇيىمداستىرۋ جۇمىستارى جۇرگىزىلەدى جانە «رۋحاني جاڭعىرۋ: بولاشاققا باعدار» ماقالاسىنا سايكەس قالادا وتەتىن شارالاردىڭ بارلىعى الدىمەن وسى ورتالىقتىڭ ساراپتاۋىنان وتەدى. سودان كەيىن كوپشىلىكتىڭ نازارىنا ۇسىنىلادى.

 سونىمەن قاتار Call-ورتالىعىنىڭ سالتاناتتى تانىستىرىلىمى وتكىزىلدى. ورتالىق قىزمەتكەرلەرى «رۋحاني جاڭعىرۋ» باعدارلاماسى بويىنشا ۇسىنىستار مەن ەسكەرتۋلەردى قابىلداپ، تۇرعىندارمەن باعدارلامانى ىسكە اسىرۋ بويىنشا تۇسىندىرمە جۇمىستارىن جۇرگىزەدى.

كەڭسەنىڭ اشىلۋ سالتاناتىنا قازاقستان رەسپۋبليكاسى پرەزيدەنتى اپپاراتىنىڭ ىشكى ساياسات ءبولىمىنىڭ مەڭگەرۋشىسى ايدا بالايەۆا ارنايى كەلدى. شارا بارىسىندا ايدا عالىم قىزى ۋنيۆەرسيتەت ستۋدەنتتەرىمەن كەزدەستى. ەلباسى الەمنىڭ ەڭ مىقتى عالىمدارىنىڭ ۇزدىك وقۋلىقتارىن قازاق تىلىنە اۋدارىپ، ونى وتاندىق وقۋ ورىندار باعدارلاماسىنا ەنگىزۋدى تاپسىرعان بولاتىن. كەزدەسۋدە قازاق تىلىندەگى «100 جاڭا وقۋلىق» جوباسى تۋرالى، كىتاپپەن بىرتىندەپ بارلىق وقۋ ورىندارى قامتاماسىز ەتىلەتىندىگىن جەتكىزدى.

«قازىر وقۋلىقتاردى قازاق تىلىنە اۋدارۋ پروتسەسى ءجۇرىپ جاتىر. بۇل وتە ماڭىزدى. بۇعان دەيىن كىتاپتار جارتىلاي اۋدارىلاتىن نەمەسە ءبىرقاتار قاتەلىكتەرمەن. قازىر مەملەكەتتىك ءتىلدىڭ ماڭىزدىلىعىن جاس ۇرپاققا ءتۇسىندىرۋ ماڭىزدى. سوندىقتان بۇل باعىتتا اتقارىلىپ جاتقان جۇمىستار كوپ»، - دەدى ايدا بالايەۆا.