قازاقستانداعى كوللەدجدەر ستۋدەنتسىز قالۋى مۇمكىن
بۇل تۋرالى بۇگىن ق ر پارلامەنتى ءماجىلىسىنىڭ دەپۋتتارىمەن كەزدەسۋ بارىسىندا استانا پوليتەحنيكالىق كوللەدجىنىڭ ديرەكتورى قاسىمحان سەنعازيەۆ ايتتى، دەپ حابارلايدى قازاقپارات ءتىلشىسى.
«ەگەر نازار اۋدارار بولساڭىزدار، قازىر جوعارى وقۋ ورىندارىنا تۇسۋشىلەردىڭ سانى 7 پايىزعا ارتتى. ارينە، بۇل ءبىر جاعىنان جاقسى. دەگەنمەن، مىنا ماسەلەگە نازار اۋدارعىم كەلەدى. كەلەسى جىلداردان باستاپ كوللەدجگە تۇسەتىندەردىڭ سانى كەمي تۇسەدى. نەلىكتەن مۇنداي جايت ورىن الماق؟ سەبەبى 1 -قىركۇيەكتەن باستاپ مەكتەپتەر جان باسىنا قارجىلاندىرۋعا كوشتى. ەگەر بۇرىندارى مەكتەپ ديرەكتورلارى ۇشكە وقيتىن وقۋشىلارىن كوللەدجەرگە جىبەرەتىن بولسا، ەندى مۇنداي بولمايدى. ولاردى دا قالدىرادى. ويتكەنى قارجى قوماقتى بولادى. ەكىنشىدەن، مەكتەپ ديرەكتورلارىن ۇ ب ت رەيتينگىنەن الىپ تاستادى. ولار ەشتەڭەگە جاۋاپ بەرمەيدى. ۇشىنشىدەن، گرانتتار سانى ارتتى. بيىل جوعارى وقۋ ورىندارىنا ءبىرىنشى كۋرستىڭ مول لەگى باردى. ماسەلەن، ەۋرازيا ۋنيۆەرسيتەتىندە بىلتىر ءبىرىنشى كۋرسقا 3 مىڭ ادام قابىلدانسا، بيىل 7 مىڭعا جەتتى»، - دەدى ول.
ونىڭ ايتۋىنشا، مۇنىڭ ۇستىنە جەرگىلىكتى اكىمدەر بەرەتىن گرانتتار بار. ماسەلەن، اعىمداعى جىلدىڭ وزىندە استانا اكىمدىگى جوعارى وقۋ ورىندارىنا 1 مىڭ ءبولىپ وتىر.
«دەمەك، قازىردەن-اق 9 -سىنىپ وقۋشىلارى جانە ولاردىڭ اتا-انالارى بىردەن جوعارى ءبىلىم الۋعا مۇددەلى بولماق. ياعني، بۇعان دەيىن كوللەدج ارقىلى ەمتيحانسىز ج و و-عا بارۋعا بولاتىن. ال قازىر كوللەدج تۇلەكتەرىنە دە ج و و-عا ءتۇسۋ ءۇشىن تالاپ قويىلىپ وتىر. بۇل پروبلەمانى زەردەلەپ، كوتەرىپ، شەشۋ قاجەت. ويتپەگەن جاعدايدا 2-3 جىلدان كەيىن ستۋدەنتسىز قالامىز. ياعني، جۇمىسشى كادرلاردان ايىرىلامىز»، - دەدى قاسىمحان سەنعازيەۆ.