كەز كەلگەن قازاقستاندىق ءوزى قالاعان ەمحاناعا تىركەلە الادى
«ەلوردادا كەپىلدەندىرىلگەن تەگىن مەديتسينالىق كومەك كورسەتۋ اياسىندا تۇرعىندارعا 51 ۇيىم قىزمەت كورسەتەدى. بۇل كورسەتكىش الدىڭعى جىلمەن سالىستىرعاندا ەداۋىر ءوستى»، - دەيدى استانا قالاسى بويىنشا فيليال ديرەكتورىنىڭ ورىنباسارى ا. امانگەلدييەۆ.
ا. امانگەلدييەۆ تۇرعىنداردىڭ ەمحانا تاڭداۋ بارىسىندا سانالى تۇردە شەشىم قابىلداپ، ۇيىنە، جۇمىس ورنىنا جاقىن نەمەسە وزىنە قولايلى دەپ تاپقان مەكەمەگە تىركەلۋگە بولاتىندىعىن اتاپ ءوتتى.
ەمحاناعا تىركەلۋ ءۇشىن الەۋمەتتىك مەديتسينالىق ساقتاندىرۋ قورىنىڭ قىزمەت كورسەتۋشىلەر تىزىمىنەن ەمحانانى تاڭداۋ قاجەت. اتالعان ءتىزىم قوردىڭ fms.kz سايتىندا ورنالاسقان. تاڭداۋ جاسالعاننان كەيىن ازامات ۇيىمنىڭ تىركەۋ بولىمىنە جەكە كۋالىگىمەن كەلىپ، باس دارىگەردىڭ اتىنا ءوتىنىش جازۋى قاجەت. ەمحاناعا تىركەلۋ بارىسىندا ءوتىنىش قابىلدانبايتىن جاعدايلار بولادى جانە ولاردى تۇسىنىستىكپەن قابىلداعان ءجون.
بىرىنشىدەن، ەگەر ءبىر دارىگەرگە تىركەلگەن ادام سانى ەكى مىڭنان اسىپ كەتكەن جاعدايدا. بۇل رەتتە تىركەۋگە ءوتىنىش جازعان ازامات قىزمەت كورسەتۋ ايماعىنان تىس جەردە تۇرىپ جاتقان بولسا، ونىڭ ءوتىنىشى قابىلدانبايدى. ال وسى مەديتسينالىق ۇيىمعا قارايتىن اكىمشىلىك ۋچاسكەسىنىڭ تۇرعىلىقتى تۇرعىنىنىڭ ءوتىنىشى ەسكەرىلەدى. ەكىنشىدەن، ەمحانانىڭ قىزمەت كورسەتەتىن ۋچاسكەسىنەن تىس اۋماقتا تۇراتىن ادام ۇيگە دارىگەر شاقىرتۋ قىزمەتىنەن باس تارتۋعا كەلىسپەگەن جاعدايدا، ول ازامات ءدال وسى ەمحاناعا تىركەۋگە تۇرا المايدى. ويتكەنى مەديتسينا ماماندارى دەر كەزىندە ناۋقاستىڭ ۇيىنە كومەك كورسەتۋ ءۇشىن بەرىلگەن ۋاقىت ىشىندە جاياۋ جەتىپ ۇلگەرمەيدى.
ەمحاناعا تىركەلۋدىڭ ەكىنشى جولى - ونلاين تارتىپتە، egov.kz پورتالى ارقىلى. ول ءۇشىن ازاماتتىڭ ەلەكتروندىق سيفرلىق قولتاڭباسى بولعانى جەتكىلىكتى.
قازاقستاندا تۇراقتى تۇرىپ جاتقان شەتەل ازاماتتارى مەن ازاماتتىعى جوق تۇلعالارعا كەلەتىن بولساق، ولار ەمحانالارعا كەدەرگىسىز تىركەلە الادى.
ازاماتتار باسقا ب م س ك ۇيىمىنا تۇرعىلىقتى مەكەن- جايىن، جۇمىسىن، وقۋ ورنىن اۋىستىرعاندا، جازاسىن وتەۋ مەرزىمى اياقتالعاننان كەيىن، اسكەري قىزمەتىن وتەپ بولعاننان كەيىن، العاشقى مەديتسينالىق- سانيتارلىق كومەك ۇيىمى قايتا ۇيىمداستىرىلعاندا نەمەسە تاراتىلعان جاعدايدا، سونىمەن قاتار، بۇرىنعى ەمحاناداعى قىزمەت ساپاسى كوڭىلدەن شىقپايتىن بولسا باسقا ەمحاناعا تىركەلە الادى.
ەستەرىڭىزگە سالا كەتسەك، مەديتسينالىق مەكەمەلەردىڭ قىزمەت كورسەتۋ ساپاسىن باعالاۋ ماقساتىندا «م س ق: حالىقتىق باقىلاۋ» موبيلدى قوسىمشاسىن ىسكە قوسقان بولاتىن. موبيلدىك قوسىمشا ازاماتتار ءۇشىن ەمحانا تاڭداۋ ماسەلەسىن ەداۋىر جەڭىلدەتىنى ءسوزسىز.