قىتايدان قارجى تارتۋ وڭاي ما
ءتوراعانىڭ ورىنباسارى مارات ءبىرىمجانوۆتىڭ ايتۋىنشا، قارجى ۇيىمدارىنىڭ ورتاق جوبالارعا قاتىسۋ كورسەتكىشى ءالى كۇنگە دەيىن تومەن بولىپ تۇر.
«ماسەلەن، بۇگىندە قازاقستاندا Industrial and Commercial Bank of China (ICBC) ، China Development Bank (CDB) سياقتى قىتايلىق بانكتەر جۇمىس ىستەيدى. بۇدان بولەك، Altyn Bank بار. ونىڭ 60 پروتسەنتىن CITIC Bank ساتىپ الدى. الايدا، اتالعان بانكتەردىڭ جارعىلىق كاپيتالى كوپ ەمەس. ولار ءىرى جوبالاردى قارجىلاندىرا المايدى. ءتىپتى، كاسىپورىنداردىڭ اينالما قاراجاتىن دا تولىقتىرۋعا جاعدايى جوق»، - دەدى م. ءبىرىمجانوۆ استانادا وتكەن قازاق- قىتاي بيزنەس فورۋمىندا.
ونىڭ ايتۋىنشا، قىتايدان اقشا العاندا قارجى ۇيىمدارى جوعارى تالاپ قويادى. ال اكتسيونەرلەر مەملەكەتتىڭ كەپىلدىگىن سۇرايدى.
«ەندى، ول جاقتا ەكونوميكادا مەملەكەتتىڭ ءرولى وراسان. سودان ولار بىزدەگى جاعداي دا سونداي دەپ ويلايدى. سوسىن سوڭعى كەزدەرى قىتايدىڭ ىشىندە يۋاندى دوللارعا ايىرباستاۋ قيىنداپ كەتتى. نەگىزى، قازاقستانعا اقشا سالعىسى كەلەتىن قىتايلىق كومپانيالاردا اقشا جاعىنان پروبلەما جوق. ءبىراق ونىڭ ءبارى يۋانمەن ساقتالعان. وسىعان بايلانىستى يۋاندى تەڭگەگە ايىرباستاۋدىڭ ءتيىمدى كليرينگتىك جۇيەسىن ويلاپ تابۋىمىز قاجەت»، - دەپ اتاپ كورسەتتى م. ءبىرىمجانوۆ.
ايتا كەتەيىك، بۇگىن استاناداعى «ريكسوس» قوناق ۇيىندە قازاق- قىتاي بيزنەس فورۋمى باستالدى.
قىتاي حالىق رەسپۋبليكاسىنىڭ كوممەرتسيا جونىندەگى ۆيتسە-ءمينيسترى رىن حۋڭبيننىڭ ايتۋىنشا، قازاقستان مەن قىتاي ساۋدا- ساتتىقتى دوللارسىز جۇرگىزۋدى كوزدەيدى.