كورەرمەندەر «نوۆايا ۆولنا» بايقاۋىندا ديماشقا گۇل سىيلاۋ ءۇشىن ساحناعا ۇمتىلدى

None
None
استانا. قازاقپارات - قازاقستاندىق ءانشى ديماش قۇدايبەرگەن سوچيدەگى «نوۆايا ۆولنا» جاس انشىلەردىڭ حالىقارالىق بايقاۋىندا العاش رەت ءان شىرقادى، دەپ حابارلايدى قازاقپارات ءتىلشىسى.

ديماش بايقاۋدىڭ العاشقى كۇنى A'Studio توبىنىڭ شىعارماشىلىق كەشىندە ونەر كورسەتتى. وعان رەسەي ەستراداسىنىڭ جۇلدىزدارى، قازاقستاندىق انشىلەر - The Jigits توبى مەن رەپپەر Jah Khalib تە قاتىستى. ديماش A'Studio-نىڭ «گرەشنايا ستراست» كومپوزيتسياسىن ورىس تىلىندە ورىنداپ، جينالعانداردىڭ قوشەمەتىنە بولەندى.

ءاننىڭ سوڭىندا زال دۋ قول شاپالاق سوعىپ، گۇل شوقتارىن سىيلاۋ ءۇشىن ساحناعا ۇمتىلدى. ءوز كەزەگىندە ديماش ولارعا العىس ءبىلدىرىپ، قازاقستانعا شاقىردى.

جاس تالانتتىڭ ايتۋىنشا، ول «نوۆايا ۆولنا» بايقاۋىنىڭ جابىلۋ كونسەرتىندە تاعى ءان شىرقايتىن بولادى.

«نوۆايا ۆولنا» بايقاۋىنىڭ قوناعى بولىپ، رەسەيگە تابان تىرەدىك. بايقاۋ باستالدى. ەندى بايقاۋدىڭ جابىلۋ سالتاناتىندا ونەر كورسەتەمىن. بارشا كورەرمەندەرگە ۇلكەن راحمەت. سوچيگە كەلگەلى اۋەجايدا تاماشا كونسەرت قويىپ، ءدام-تۇزبەن كۇتىپ العان كورەرمەندەرىمنەن اينالدىم. قۇرمەتتەرىڭىزگە ۇلكەن العىس»، - دەپ جازدى ديماش ينستاگرامداعى پاراقشاسىندا.

«نوۆايا ۆولنا» بايقاۋى 2002-جىلدان بەرى وتكىزىلەدى. ونىڭ نەگىزىن قالاۋشىلار كومپوزيتورلار - يگور كرۋتوي جانە رايموند پاۋلس. تانىمال ءانشى اللا پۋگاچيەۆا بايقاۋ قاتىسۋشىلارىنىڭ مۋزاسى، ول 2005-جىلدان 2014-جىلعا دەيىن ءوزىنىڭ «زولوتايا زۆەزدا اللى» سىيلىعىن تابىس ەتىپ كەلگەن بولاتىن. ونىڭ سىيلىعىن قاتارىنان ەكى رەت العان جالعىز قاتىسۋشى - قازاقستاننىڭ «Rin'Go» توبى (2007- جانە 2011-جىلدارى).

«نوۆايا ۆولنا-2018» بايقاۋىندا قازاقستان اتىنان استانالىق ماديار ءجۇنىسوۆ (ساحنادا - Mad June) قاتىسىپ جاتىر.

سوڭعى جاڭالىقتار