تانىمال قازاق اكتريساسى وزگە ۇلت وكىلىنە تۇرمىسقا شىعۋعا قارسى ەمەس

 استانا. قازاقپارات - بەلگىلى اكتريسا سايا ورازعاليەۆانىڭ پىكىرىنشە، ارالاس نەكەدە ايىپ جوق. كينو جۇلدىزى بولاشاقتا وزگە ۇلت وكىلىنە تۇرمىسقا شىعۋعا قارسى ەمەس.

سايانىڭ ايتۋىنشا، ەكى ادام ءبىر-ءبىرىن ءسۇيىپ ءارى ءتۇسىنىپ تۇرسا، ونىڭ ۇلتىنىڭ قانداي بولعانى ماڭىزدى ەمەس.

بۇل تۋرالى سايا Hit-Tv ارناسىنا بەرگەن سۇحباتىندا ايتتى، دەپ جازادى Stan.kz اقپاراتتىق اگەنتتىگى.

«مەن ارالاس نەكەگە قارسى ەمەسپىن. كوزقاراسىم تۋرا. بالكىم كەيبىرەۋلەر مەنى وسى ءسوزىم ءۇشىن سوگۋى مۇمكىن. ءبىراق بارلىعىمىز دا قۇدايدىڭ جاراتقان پەندەسىمىز. سونى ەستەن شىعارمايىق. ماحاببات، تۇسىنىستىك پەن سەنىم بولسا بولعانى. جالپى قازاقتاردا وزگە ۇلتپەن نەكەلەسۋگە بولمايدى دەگەن نانىم قالىپتاسقان»، - دەيدى ورازعاليەۆا.

ءبىر قىزىعى، سايانىڭ وتباسىندا ارالاس نەكەگە تۇرعان ازاماتتار مەن ازاماتشالار كوپ بولىپ شىقتى.

«وتباسىمىزدا ورتاق ايتىلاتىن ءسوز بار. «جامان ۇلت بولمايدى، جامان ۇل بولادى». ءبىز ءارتۇرلى ۇلت وكىلىنىڭ قانى ارالاسقان جانۇيامىز. اتا- بابامنىڭ كەيبىرىنىڭ جۇبايلارى باسقا ەتنوس وكىلى. ماسەلەن، اتامنان التى ۇرپاق تاراعان. ءارقايسىسى ءارتۇرلى ۇلت وكىلىمەن وتباسىن قۇرعان. اپكەمىز تاتارعا، اعامىز ورىستان قىز العان. قازاقتار دا بار. ءبىز مۇسىلماندارمەن قاتار، وزگە دە ءدىن وكىلدەرىنىڭ ايتۋلى كۇندەرىن تويلايمىز»، - دەيدى اكتريسا.