جەتى اتانىڭ ۇرپاق تاعدىرىنا اسەرى قانداي؟

 استانا. قازاقپارات - بۇل فانيمەن قوشتاسقان سوڭ ءارۋاق ءىز-ءتۇسسىز جوق بولىپ كەتپەيدى. ولاردىڭ ۇرپاقتارىمەن اقپاراتتىق، تەكتىك بايلانىسى ۇزدىكسىز جالعاسا بەرەدى.

كونە زامانداعى وركەنيەتتەردىڭ كوپشىلىگى ولىلەر جانىمەن بايلانىستىڭ بارىنا سەنگەن. ءۇرىم- بۇتاعى جەتى اتاسىنان بەرى قارعىسقا ۇشىراعان دەگەن سوزدەر بار.

گرەك اڭىزدارىندا تانتالدىڭ جەتى ۇرپاعى وعان ايتىلعان قارعىسقا ۇشىراعان دەلىنەدى. بالا ولتىرگەنى كۇناسىن سولاي ارقالاعان. كريميناليست چەزارە لومبروزو تەكتىك زەرتتەۋ جاساعان. قىلمىس جاساعانداردىڭ دەنى تەگىندە سونداي اقپاراتتىڭ جازىلۋىنان وسىنداي جولعا تۇسكەنىن دالەلدەيدى. ادامنىڭ دارىنى مەن كەمشىلىگى تەگىنەن بەرىلەتىنى راس. جۇلدىزناماشىلار قارعىس ارقالاعان ادامنىڭ تاعدىرى جۇلدىزناماعا ساي بولمايتىنىن ايتادى.

گەنوسكوپ

اۆەستاداعى جەتى اتانىڭ ۇرپاققا اسەرىن جۇلدىزناماشىلار «گەنوسكوپ» دەپ اتاعان. ول جەكە باستىڭ جۇلدىزناماسىنان بولەكتەۋ. وندا ومىرلىك جاعدايلار مەن باستان كەشۋ باسقا سيپاتپەن سۋرەتتەلەدى. ەگەر ادام ءولى بالىق قۇساپ اعىسپەن اعا بەرسە، ەسكىنىڭ سالعان جولىمەن اعىپ وتەدى. جەكە تۇلعا ەكەنىن سەزىنىپ، ءومىرى ءۇشىن، تاعدىرى ءۇشىن جاۋاپكەرشىلىكتى موينىنا الا بىلگەن ادام عانا قۇيتۇرقى بايلانىستاردى ۇزەدى. جاڭا جولعا تۇسەدى. سول ءۇشىن بيىك بەلەستەردى باعىندىرادى.

ادامنىڭ رۋحاني تازالىعى عانا گەنوسكوپتا جازىلعان تاڭبانى وزگەرتە الادى. ءوز تاعدىرىن باسقا ارناعا بۇرادى. ادامدى كارمانىڭ ەزگىسىنەن بوساتادى. مۇنداي جاعداي سيرەك كەزدەسەدى. سەبەبى، ءار ادام اتا- باباسىنىڭ جەتى اتادان بەرى بەرىلىپ كەلە جاتقان تاعدىرىن ارقالاپ كەلە جاتقانىن اڭعارمايدى. تازالانعان سوڭ ءوزى جاڭا ۇرپاقتىڭ باباسى ساناتىنا ەنەتىنىن دە تۇسىنبەيدى.

كوبىنە ادامدار وسىنداي جەتى اتادان بەرىلىپ كەلە جاتقان تاعدىردىڭ قۇربانى بولادى. ءوز ءومىرىن ەمەس، باباسىنىڭ موينىندا قالعان قارىزدى وتەپ جاتقانىن سەزبەيدى.

گەنوسكوپتى انىقتايتىن بىرنەشە ەرەجە بار:

1. جۇلدىزناما اسەر ەتپەيتىن ادام (ءتىپتى تۋعان كۇنى دە ادام بولمىسىن ايقىنداماسا، وندا ول بولەك تاعدىر يەسى بولعانى)؛

2. بابالار تاعدىرىن قايتالاۋ. تەكتىك اۋرۋلاردىڭ شىعۋى، پسيحولوگيالىقكومپلەكستەر، الدىڭعى ۇرپاقتىڭ كەمشىلىكتەرىنىڭ بەرىلۋى؛

3. بابالارىنىڭ بەلگىلەرىنىڭ قايتالانۋى (قال، مەڭ)؛

4. تۋعان كۇنىنىڭ اتالارىنىڭ تۋعان نەمەسە ولگەن كۇنىنە ساي كەلۋى؛

5. بالانىڭ شالا تۋۋى، نەمەسە كۇنى اسىپ كەتۋى؛

6. بالانىڭ ءتىسىنىڭ ەرتە شىعۋى؛

7. تۇسىندە بابالارىن ءجيى كورۋى، بايلانىسۋ.

ايتىلعان ەرەجەلەردىڭ بىرنەشەۋى بىلىنسە، وندا بۇل ادامنىڭ جەكە قالاۋى جەتى اتاسىنان بەرگى تاعدىرلاردىڭ جەتەگىندە كەتەدى. ول ادامنىڭ دامۋى بابالار قالاۋىنان اسا المايدى. جەكە دارىنىن كورسەتۋ قيىنداۋ بولادى. مۇنداي كەزدە كوپشىلىك سول بابالارعا اماناتتايدى. سەبەبى، جەتى اتا تىزبەگىندە جاقسى ادامدار جاقسىلىققا باستايدى. جاماندارى قياناتقا باستاۋى دا مۇمكىن. جەتى اتانىڭ ءاربىرى جەتى ءتۇرلى عالامشارمەن بايلانىستا بولاتىندىقتان ولاردىڭ اسەرى اركەلكى بولادى.

جەتى اتانىڭ ۇرپاعىمەن بايلانىسى

بۇل بايلانىس تۋعان كۇنگە تىكەلەي تاۋەلدى. سەبەبى، عالامشارلاردىڭ ورىنى تۇراقسىز. ءار ادامعا 126 اتاسىنىڭ قايسىسى تىكەلەي اسەر ەتەتىنىن جۇلدىزناماشىلار ايتىپ بەرە الادى. ونى عالامشارلار ايقىندايدى. وسىنداي ادامنىڭ جۇلدىزناماسىن تەرەڭ زەرتتەيدى. سول ارقىلى ونىڭ باستاۋشى عالامشارىن تابادى. ول ءۇشىن گەنوسكوپ بويىنشا ءبىرىنشى ۇرپاق كۇنمەن، ەكىنشى ۇرپاق ايمەن، ءۇشىنشى ۇرپاق مەركۋرييمەن، ءتورتىنشى ۇرپاق شولپانمەن، بەسىنشى ۇرپاق مارسپەن، التىنشى ۇرپاق يۋپيتەرمەن، جەتىنشى ۇرپاق ساتۋرنمەن بايلانىسقانىن انىقتاۋ كەرەك.

وسىنى تۇبەگەيلى تۇسىندىرسەك:

№1-ۇرپاق - ءبىز ءوزىمىز. كۇنمەن بايلانىستى - ول عالامشارلاردىڭ كىندىگى. قۋات-كۇشتىڭ باستاۋى. ءومىردىڭ سيمۆولى. ءبارى بىزدەن باستالادى. گەنوسكوپتاعى جەتى ساتىلى پيراميدا ءار ادامنىڭ وزىنەن باستالۋى دا وسىدان.

№2-ۇرپاق - اكە-شەشەمىز. ولار جۇپ. اكەلەر مەن شەشەلەر جەردىڭ سەرىگى ايمەن بايلانىستى. كوڭىل- كۇيدىڭ قالىپتاسۋىنا زور ۇلەس قوسادى. تۇيسىكپەن، سانامەن، رەفلەكستى تۇردە ادامنىڭ كوڭىلى ايعا تاۋەلدى. ونىڭ قوزعالىسى، وزگەرىسىنە باعىنىشتى. بالا كۇنىمىزدە بەرىلەتىننىڭ ءبارى: ادەتتەر، ءومىردى قابىلداۋ، كوڭىل- كۇيدى رەتتەۋ - ءبارى ءۇشىن اتا- اناعا قارىزدارمىز. جۇلدىزناماسىندا ايدىڭ اسەرى مول بولسا، ول ادام ەسەيگەندە دە بالا سياقتى قالىپ كەتەدى. وكپەشىل، رەنجىگىش، ەركە. اڭعالدىق پەن ينفانتيليزم ەرەسەك ادامعا ءتان بولسا، اتا- اناسىنىڭ شەكتەن تىس جاقسى كورىپ، وبەكتەۋىنەن. ەكىنشى ۇرپاقتىڭ ءسىزدىڭ تۇلعا بولىپ قالىپتاسۋىڭىزعا قوسار ۇلەسى زور. بالا مەن اتا- انا اراسىنداعى تەكتىك بايلانىس بۇزىلسا، ونداي ادام دارىندى بولا تۇرا ومىردەن ءوزىن تابا الماي قينالادى. رۋحتاس ادامدارمەن اشىلىپ سويلەسۋ، دۇرىس شەشىمگە كەلە ءبىلۋ انانىڭ اق سۇتىمەن بەرىلەدى، ولاي بولماسا ادامنىڭ ەڭ العاشقى قادامىمەن قالىپتاسادى. ونىڭ ءبارىن اتا- انا قالىپتاستىرادى.

№3-ۇرپاق - اتا-اجەمىز. ولار تورتەۋ. بۇل ۇرپاق مەركۋرييمەن بايلانىستى. كىسىمەن ارالاسۋ، سويلەسە ءبىلۋ، اقپارات الماسۋ، وقۋ سياقتى دۇنيەلەر وسى ۇرپاقتان بەرىلەدى. اتا-اجەسىنەن ادامدار ويلاۋ قابىلەتىن، اينالانى تانۋدى ۇيرەنەدى، ولاردان بەرىلگەن دارىنىن ۇشتايدى، مىنەز- قۇلىقتىڭ كوپ بولىگىن وسى ادامدار بەرەدى. اراسىندا ءبىر ۇرپاق قالدىرىپ بارىپ تەكتىك اقپارات ايقىن بولا باستايدى. ەگەر اتا- اجەسى عىلىممەن شۇعىلدانسا، نەمەرەسىنىڭ سوعان يكەمدى بولۋى ءجيى كەزدەسەدى. ءبىراق بۇل قاسيەتتەر ءوز بالاسىنا بەرىلمەيدى. تالانتتى ادامنىڭ بالاسى تالانتتى بولمايتىنىن ومىردە كوپ كورۋگە بولادى.

№ 4-ۇرپاق - اكەمىزدىڭ اتا- اجەسى. ولار 8 ادام. ولار شولپاننىڭ قۇزىرىندا. ونىڭ تۇتاس ءبىر اينالىسى سەگىز جىلعا تەڭ. جەتى اتانىڭ تۋرا ورتاسى. ولار تىنىشتىق پەن بەرەكەنىڭ ۇيىتقىسى سانالادى. شولپانمەن ماحاببات، ومىرگە عاشىق بولۋ، دۇنيە- بايلىققا مۇقتاجدىق سەكىلدى قۇبىلىستار ساي. ماڭداي تەرمەن تاپقان داۋلەت ميراسقورلىقپەن بەرىلەدى، سوعان يە بولعان ۇرپاق ونى ەسەلەپ، كوبەيتىپ وتىرۋى كەرەك دەلىنەدى.

ەگەر ءتورتىنشى اتاڭىز باي بولسا، وندا بۇگىنگى ۇرپاعى قالايدا بايلىققا كەنەلەدى. اقشا تابۋ قابىلەتى زور بولادى. ەگەر شەشەسى جاعىنان بىرەۋدىڭ الا ءجىبىن اتتاعان بولسا، ول كۇنا ۇرپاعىنا بەرىلىپ، ولارعا بايۋعا جول اشىلمايدى.

№5-ۇرپاق - اتاڭىزدىڭ اتالارى. ولار - 16 ادام. بۇل ۇرپاققا مارس ساي كەلەدى. مارسقا قارىم- قابىلەت، ەرىك- جىگەر، ماقساتقا جەتۋ، جەڭە ءبىلۋ قاسيەتتەرى ءتان. مارس -  ارەكەتكە باستايدى. ەرىك- جىگەرسىز، قۋاتسىز، قۇمارلىقسىز ادام ەشتەڭەگە قول جەتكىزە المايدى. مارستىڭ ۇرپاعىنان اسكەري قاسيەتتەر بەرىلەدى. شەشىمتالدىق، ارەكەتشىلدىك بەرىلەدى. قورقاقتىق، قاتىگەزدىك، ماقساتسىز كەكشىلدىك وسى اتاسىنىڭ كۇناعا باتۋىنان بەرىلەدى.

№ 6-ۇرپاق -  بۇلار - 32 ادام. التىنشى اتامىز يۋپيتەر عالامشارىمەن بايلانىستى. يۋپيتەر -  بيلىك، رۋحاني جەتىلۋ، الەمدى تانۋ، ابىروي عالامشارى. 32 دەگەن سان توتەم سەكىلدى. ادامنىڭ 32 ءتىسى ىسپەتتى. ەرتە تۇسكەن تىستەر وسى اتامىزبەن ۇزىلگەن بايلانىستى مەڭزەيدى. جاي عانا ۋاقىت جەتەگىندەگى بايلانىس ۇزىلمەگەن. ءبىرتۇتاس تاريحي بايلانىس توقتاعان. التىنشى اتا ارقىلى ۇلتتىق انىقتاۋىشپەن بايلانىس تىعىز بولادى. التىنشى اتادا ۇجىمدىق سيپات كەڭ قولدانىلادى. ۇجىمدىق قۋات مول. ءداستۇر، ىرىم- تىيىم، اقيقات ءبىلىم مەن تانىم وسى التىنشى اتامىزدان بەرىلەدى.

№ 7-ۇرپاق - سوڭعى اتا. مۇندا 64 ادام. بۇگىنگى ۇرپاقتان ەڭ الىستا، ولار جەردەن الىس ورنالاسقان ساتۋرن عالامشارىنا تاۋەلدى. ودان بولەك، ۋران، نەپتۋن، پلۋتون سەكىلدى عالامشارلار دا بار. ولار سايكەسىنشى 8-، 9-، 10- اتالارىمىزدىڭ رۋحىنا ءتان. بۇدان 200 جىل بۇرىن تۋعان اتا-باباسى تۋرالى ءبىلۋ تەك اقسۇيەكتەرگە ءتان قۇبىلىس. بۇل بايلانىس جەتى اتانىڭ تىعىز قارىس- قاتىناستا بولاتىندىعىن بىلدىرەدى. ول ادام ءومىرىنىڭ ولشەۋىشى. تاعدىرىنىڭ قانداي بولاتىنىن كورسەتەدى. ادامنىڭ شىن مانىندەگى ماقساتىن انىقتايدى. جەتىنشى بابا -  ءبارىنىڭ باستاۋى.

سونىمەن 7 اتا (126 ادام) ادام ومىرىنە بىلايىنشا اسەر ەتەدى:

1- ۇرپاق -  بۇل ءبىز، ءبىزدىڭ «مەنىمىز»، ساناقتىڭ باسى. كۇننىڭ قۋاتىمەن كۇش جينايدى.

2- ۇرپاق - اكە-شەشە. اي ءبىزدىڭ ەت جاقىندارىمىزدى رەتتەيدى. الەمدى قالاي تانۋىمىزعا اسەر ەتەدى. كوڭىل-كۇي، دەنساۋلىقتى رەتتەيدى. ارى قاراي جەتىلۋدىڭ، ومىردەن ءوز ورنىڭدى تابۋدىڭ نەگىزى. جۇلدىزناماسىندا اي كوپ اسەر ەتەتىن ادامدارعا اسەر ءتىپتى كوپ.

3- ۇرپاق -  اتا-اجە. قابىلداۋ اسەرىن بەرەدى، ويلاۋ مۇمكىندىگىن، ارالاسۋ قابىلەتىن، بويداعى دارىن مەن سىيىسا ءبىلۋدى دارىتادى.

4- ۇرپاق -  8 ادام. ءبىزدىڭ تاعدىرىمىزداعى ماحاببات پەن سۇيىسپەنشىلىك سەناريلەرىن جاسايدى. ۇيلەسىمدى ءومىر ءسۇرۋدى سىڭىرەدى. داۋلەتتى ءومىر ءسۇرۋىمىزدى قامتاماسىز ەتەدى.

5- ۇرپاق -  16 ادام. پاسسيونارلىق قابىلەتى زور بولادى. ارەكەتشىل، ومىرگە قۇشتارلىق وسى اتادان بەرىلەدى. وزگەنى جەڭۋ، تىزە بۇكتىرۋ، ەرىك-جىگەرىنىڭ مىقتى بولۋى بەرىلەدى. كەرى جاعى -  اشۋشاڭدىق، كەكشىلدىك.

6- ۇرپاق -  32 ادام. ادام تاعدىرىنداعى سالت-ءداستۇر، ادەت- عۇرىپپەن بايلانىسىن، ىرىم- تىيىمداردى، رۋحاني ۇستانىمداردى تەكپەن بەرەدى. الەۋمەتتىك مارتەبە دە وسى اتادان جەتەدى.

7- ۇرپاق -  64 ادام. وسى اتا تاعدىردا كەزدەسەتىن قيىندىق، سىناقتى جەتكىزۋشى. ادامنىڭ ءوز تاعدىرىن جاساۋىنا بەلگى بەرەدى.

 قىزىقتى جايت:

اكە-شەشەسىنە كەلبەتى قاتتى ۇقسايتىن بالالار - ەگەر بالا اكەسىنە تارتسا، ول ءوز تەگىمەن تىعىز بايلانىستى. اناسىنا تارتسا، بايلانىسى السىزدەۋ. تەكپەن بەرىلەتىن كوپ كىناراتتان ازات بولعانى، تاڭداۋ جاساۋدا ەركىن.

جەتى اتاڭدى تانۋ تەك قۇدا تۇسۋگە عانا مۇقتاجدىق بولماسىن. تاريح دەپ قانا قاراماڭىز. تەكتى تانۋ بۇگىندى وتكەن مەن ەرتەڭنىڭ قاسىرەتىنەن ساقتايدى.

جەتى اتا تۋرالى تەرەڭ ءبىلۋ - ءار ادامنىڭ پارىزى. ءوز جولىن ءجۇرىپ وتكىسى كەلەتىن تاعدىر يەلەرىنىڭ تاڭداۋى. جەتى اتانىڭ باسىنان كەشكەن وقيعالارى، بويىندا بولعان جاعىمدى قابىلەتتەر ءاربىر ۇرپاققا ۇلگى بولا الادى. شەشىلمەگەن تۇيتكىلدەر، كىنا، كۇنا جاسالعان بولسا، سونى رەتتەۋ بۇگىنگى ۇرپاقتىڭ مىندەتى. ونى تەك تەگىن تاني وتىرىپ ىستەي الاتىنىن ءتۇسىندىرۋ شارت ەمەس شىعار. ءوز تەگىڭىزدى جاعىمسىز تاعدىر سىيىنان ساقتاعىڭىز كەلسە، ءوزىڭىزدىڭ كىم ەكەنىڭىزدى، كىمنەن تاراعانىڭىزدى ءبىلىپ ءجۇرىڭىز.

دەرەككوزى: «ءداستۇر» توپتاماسىنان