الماتىلىق ونەرتاپقىش كوزى ناشار كورەتىن جاندارعا ارناپ قوسىمشا ويلاپ تاپتى
ليۋبوۆ دۋدچەنكو ەسىمدى الماتىلىق 16 جاستاعى ونەرتاپقىش ارنايى قوسىمشا ويلاپ تاپتى. ونىڭ جوباسى قىتايدا جاسوسپىرىمدەر اراسىندا وتكەن عىلىمي-تەحنيكالىق بايقاۋدا جۇلدەلى ورىنعا يە بولعان.
«قوسىمشانىڭ جۇمىس ىستەۋ پرينسيپى وتە قاراپايىم»، - دەيدى ليۋبا.
ونىڭ كومەگىمەن كەز كەلگەن تەرىلگەن ءماتىن دىبىستىق جازباعا نەمەسە برايل تاڭباسىنا اۋىسادى. الەمدە مۇنداي باعدارلامالار بار. الايدا ليۋبانىڭ جوباسى پايدالانۋ قاراپايىمدىلىعىمەن ەرەكشە. سوندىقتان ونى شەتەلدە جوعارى باعالاعان.
«بولاشاقتا جاڭا تەحنولوگيالار جاساۋمەن اينالىسقىم كەلەدى. بالكىم ءوز كومپانيامدى اشاتىن شىعارمىن. جوبالارىم مۇمكىندىگى شەكتەۋلى جاندارعا ارنالادى. ولارعا زاماناۋي تەحنولوگيانىڭ كومەگىمەن كومەكتەسكىم كەلەدى»، - دەيدى نازاربايەۆ زياتكەرلىك مەكتەبىنىڭ وقۋشىسى ليۋبوۆ دۋدچەنكو.
دانەكەرلەۋشى اسپاپ پەن مۋلتيولشەگىش - روبوت جاساۋداعى نەگىزگى قۇرالدار. ولارمەن جۇمىس ىستەۋدى مەڭگەرگەن جاس ءوسپىرىم قۇرىلعىنىڭ تەحنيكالىق بولىگىنە جاۋاپتى. ال جوبانى تانىستىرۋ - سەليمجان چالىشكاننىڭ مىندەتى.
«جوبامەن كۇنى- ءتۇنى اينالىساتىن كەزدەر بولادى. وندايدا ماڭىزدى ماسەلەلەردى دە ەكىنشى ورىنعا ىسىرىپ قويامىز. جۇمىسىڭ ناتيجەلى بولى ءۇشىن وعان جان تانىڭمەن بەرىلىپ ىستەۋ كەرەك»، - دەيدى نازاربايەۆ زياتكەرلىك مەكتەبىنىڭ وقۋشىسى سەليمجان چالىشكان.
ليۋبوۆ دۋدچەنكونىڭ يننوۆاتسيالىق قورجىنىندا ونداعان يدەيالار مەن دايىن جوبالار بار. قازىر ول تەلەفونعا ارنالعان جاڭا قوسىمشا جاساۋمەن اينالىسىپ ءجۇر.