كوشپەندىلەر وليمپياداسى: قازاقستان كوكپارشىلارى ەسەسىن قايتارا الا ما
وسى جولى قازاقستان ءوز كومانداسىن كۇشەيتىپ، سپورتشىلاردىڭ سانىن ءۇش ەسەگە ارتتىرىپ وتىر، دەپ حابارلايدى قازاقپارات ءتىلشىسى.
بيىلعى ويىندار 37 ۇلتتىق سپورت ءتۇرى بويىنشا وتەدى. سونىڭ ىشىندە كۇرەس، ساداق اتۋ، يتپەن اڭ اۋلاۋ، ات جارىس، كوكپار، اسىق اتۋ جانە تاعى باسقا جارىستار بار. ويىندارعا الەمنىڭ 60-تان استام ەلىنەن 2 مىڭعا جۋىق سپورتشى قاتىسادى. قىرعىزستان ەڭ ۇلكەن كوماندانى شىعارىپ وتىر. سپورتشىلار سانى - 458 ادام. ودان كەيىن رەسەي - 235 سپورتشى، ال قازاقستان 195 سپورتشىنى اكەلدى. وسىدان ەكى جىل بۇرىن وتكەن ويىنداردا قازاقستاندىق كوماندادا 75 سپورتشى بولعان. ەكى جىل بۇرىن قازاقستان قۇراماسى ءۇشىنشى ورىننان كورىنسە دە، كوكپارشىلارىمىز قىرعىز كومانداسىنان وڭباي ۇتىلدى. وسى جولى قازاقتىڭ جىگىتتەرى ەسەسىن قايتارۋدى كوزدەيدى.
قاتىسۋشى مەملەكەتتەردىڭ ىشىندە اۋعانستان، بولگاريا، بەلارۋس، ءۇندىستان، يران، موڭعوليا، قىتاي، پاكىستان، پولشا، تاجىكستان، تۇرىكمەنستان، وزبەكستان، ا ق ش، ۋكراينا، فرانسيا، شري-لانكا جانە تاعى باسقالار بار. ولاردىڭ بارلىعى 594 مەدال ءۇشىن تالاسادى. سونىڭ ىشىندە 174 التىن، 173 كۇمىس جانە 247 قولا مەدال بار. دۇنيەجۇزىلىك كوشپەندىلەر ويىندارىنىڭ سىياقى قورى 26 ميلليون سومدى قۇراپ وتىر. بۇل قازىرگى كۋرسپەن 136,5 ميلليون تەڭگە نەمەسە 381,3 مىڭ دوللاردى قۇرايدى.
ايتا كەتەيىك، 2012 -جىلى بىشكەكتە وتكەن تۇركى تىلدەس ەلدەرى ىنتىماقتاستىق كەڭەسىنىڭ II سامميتىندە قىرعىز ەلى دۇنيەجۇزىلىك كوشپەندىلەر ويىندارىن وتكىزەتىنىن مالىمدەگەن بولاتىن. نەگىزگى ماقسات - تۇركى حالىقتارى اراسىنداعى مادەني- رۋحاني بايلانىستى نىعايتۋ. ق ر پرەزيدەنتى نۇرسۇلتان نازاربايەۆتىڭ باستاماسىمەن قۇرىلعان تۇركى كەڭەسى دە وسىنى كوزدەيدى. اتالعان ۇيىمنىڭ سوڭعى ءسامميتى 2015 -جىلى استانا قالاسىندا وتكەن بولاتىن. بيىل قىرعىزستان كەزەكتى ءسامميتتى دۇنيەجۇزىلىك كوشپەندىلەر ويىندارىمەن ورايلاستىرىپ وتىر.
ويىنداردىڭ رەسمي اشىلۋ سالتاناتى چولپان-اتا قالاسىنىڭ يپپودرومىندا وتەدى. وعان ق ر پرەزيدەنتى نۇرسۇلتان نازاربايەۆ تا قاتىسادى. ۇيىمداستىرۋشىلار وسى جولعى اشىلۋ سالتاناتىن ەرەكشە وتكىزەمىز دەپ وتىر. كەلەسى كۇنى تۇركى ەلدەرى ىنتىماقتاستىق كەڭەسىنىڭ VI ءسامميتى ۇيىمداستىرىلادى. بيىل تۇركى ەلدەرىنىڭ تورتتىگى - قازاقستان، قىرعىزستان، تۇركيا مەن ءازىربايجانعا وزبەكستان قوسىلادى دەگەن جوسپار بار. سامميتتىڭ تاقىرىبى - «جاستار ساياساتى مەن ۇلتتىق سپورت تۇرلەرى سالاسىنداعى ىنتىماقتاستىق».