لاتىنشا «الىپپە» وقۋلىقتارى دايىندالىپ جاتىر - ءبىلىم ءمينيسترى

استانا. قازاقپارات - لاتىنشا «الىپپە» جانە كيريليتسادا «بۋكۆار» بازالىق وقۋلىقتارىن دايىنداۋ جۇمىسى ءجۇرىپ جاتىر.

بۇل تۋرالى ورتالىق كوممۋنيكاتسيالار قىزمەتىندە ق ر ءبىلىم جانە عىلىم ءمينيسترى ەرلان ساعاديەۆ ءمالىم ەتتى، دەپ حابارلايدى قازاقپارات.

«وتكەن جىلى ەلباسى، ۇكىمەت ءبىزدىڭ ءبىلىم سالاسىنا، جاستارىمىزعا، ۇستازدارعا ەرەكشە نازار اۋدارىپ، ۇلكەن قامقورلىق كورسەتىپ، وسىنىڭ ارقاسىندا ءبىرشاما ماڭىزدى ماسەلەلەر شەشىلدى. الداعى وقۋ جىلىنىڭ باستى مىندەتى - ۇستازداردىڭ جاعدايىن جاقسارتا وتىرىپ، ءبىلىم بەرۋ ۇيىمدارىنىڭ جاۋاپكەرشىلىگىن ارتتىرۋ. بۇگىندە مەملەكەتتىك-جەكەشەلىك ارىپتەستىك مەكتەپكە دەيىنگى بىلىمدە ەڭ جاقسى دامىعان. جەكەمەنشىك بالاباقشالار ۇلەسى %30- دان استى. ال 3-6 جاستاعى بالالاردى بالاباقشامەن قامتۋدى 93 پايىزعا جەتكىزدىك»، - دەدى ساعاديەۆ.

ونىڭ سوزىنە قاراعاندا، «بالاپان» باعدارلاماسى ارقىلى بالاباقشالارداعى جالپى ورىن سانى حالىقتىڭ سۇرانىسىنان استى. ءبىراق بۇل رەسپۋبليكا بويىنشا كورسەتكىش. وكىنىشكە قاراي، ايماقتاردا تەڭگەرىمسىزدىك بار.

«بۇل جاعداي ميگراتسياعا بايلانىستى. ءىرى قالالاردا، اسىرەسە الماتى مەن استانادا تاپشىلىق ۇلكەن. ودان كەيىنگى ماڭىزدى جۇمىس - ول بالاباقشاعا كەزەككە تۇرۋ مەن جولداما بەرۋدى تولىعىمەن ەلەكتروندى فورماتقا اۋىستىرۋ. سوندا كەزەك جاريا تۇردە جانە تەز جىلجيتىن بولادى»، - دەدى مينيستر.

سونىمەن قاتار ول كەلەسى جىلدان باستاپ ءنولىنشى سىنىپ تاربيەشىلەرى مەن مۇعالىمدەرىن دايىنداۋ شارالارى باستالاتىنىن اتاپ ءوتتى.

«لاتىنشا «الىپپە» جانە كيريليتسادا «بۋكۆار» بازالىق وقۋلىقتارىن دايىنداۋ جۇمىسى ءجۇرىپ جاتىر. وقۋلىقتار 2020-2021 وقۋ جىلىنا دايىن بولادى»، - دەدى ۆەدومستۆو باسشىسى.