تانىمال قازاق ءانشىسى حالىقارالىق بايقاۋدا توپ جاردى

 استانا. قازاقپارات - «اعايىندى جۇگۇنىسوۆتەر» توبىنىڭ ءانشىسى ميراس جۇگۇنىسوۆ حالىقارالىق ءان بايقاۋىندا ەلىمىزدىڭ اتىنان ونەر كورسەتىپ، جوعارى ناتيجەگە قول جەتكىزدى.

ونەر يەسى گرۋزيادا وتكەن حالىقارالىق «جىبەك جولى جۇلدىزى» بايقاۋىندا 1-ورىن الدى.

بۇل تۋرالى ءانشى ساكەن مايعازيەۆ جەلىدەگى پاراقشاسىندا جازدى.

«اعايىندى جۇگۇنىسوۆتەردىڭ ءانشىسى، گرۋزيادا وتكەن حالىقارالىق بايقاۋدىڭ 1-ورىن يەگەرىن قۇتتىقتاپ قويالىق، وتانداستار! بيىكتەن كورىنە بەر، قۇلىنشاق!» - دەپ اقجارما تىلەگىن جەتكىزدى ول.

ايتا كەتەيىك، اتالعان ءان دوداسىنا 14 ەلدەن كەلگەن انشىلەر قاتىسقان. ولاردىڭ قاتارىندا قازاقستان، قىرعىزستان، رەسەي جانە تاجىكستاننان قاتىسۋشىلار بار. ۇيىمداستىرۋشىلاردىڭ ايتۋىنشا، فەستيۆال جىل سايىن ۇلى جىبەك جولى بويىنداعى مەملەكەتتەر اراسىندا وتەدى.