اقمولا وبلىسىندا ۇزدىك كەلىن انىقتالدى

None
None
كوكشەتاۋ. قازاقپارات - اقمولا وبلىسىنىڭ سەلينوگراد اۋدانىندا «كەلىن - وتباسىمىزدىڭ ىرىسى» اتتى كەلىندەرى بايقاۋ ءوتتى.

سايىسقا قاتىسۋشىلار سالت-ءداستۇردى، مادەنيەت- تۇرمىس ادەت-عۇرىپتارىن پاش ەتتى، دەپ حابارلايدى قازاقپارات ءتىلشىسى اۋداندىق ىشكى ساياسات بولىمىنە سىلتەمە جاساپ.

قىز بالا بوي جەتىپ، اق بوساعادان اتتاپ، ءبىر ءۇيدىڭ، ءبىر اۋلەتتىڭ كەلىنى اتانۋى - ەجەلدەن كەلە جاتقان قازاق ءداستۇرى. ۇلتتىق تاربيەنى ءون بويىنا دارىتا العان قىز بالا سول اۋلەتتىڭ ءتۇتىنىن تۇتەتىپ، شاڭىراعىن بيىكتەتىپ، اۋىل- ايماققا قادىرلى بولىپ كەتەدى. قازاق كەلىنى قاشان دا وتباسىنداعى اۋىزبىرشىلىكتىڭ ۇيىتقىسى بولعان.

«كەلىندەر بايقاۋىنىڭ باستى ماقساتى دا - وسى ۇلاعاتتى سالت- ءداستۇرىمىزدى جالعاستىرۋ، قازاق كەلىندەرىنىڭ بەينەسىن دارىپتەۋ، جاس ۇرپاققا ۇلگى- ونەگە كورسەتۋ. ۇلتتىق كيىم كيىپ شىققان كەلىندەر ساحنا تورىندە بەسىك تەربەتىپ، بەسىك جىرىن ايتتى. ءار نومىردە قاتىسۋشىلار وتباسلىق قۇندىلىقتاردى ناسيحاتتادى»، - دەپ اتاپ ءوتتى سەلينوگراد اۋداندىق ىشكى ساياسات بولىمىندەگىلەر.



بايقاۋعا ارشالى، استراحان، سەلينوگراد، قورعالجىن، ەرەيمەنتاۋ جانە اقكول اۋداندارىنان كەلگەن كەلىندەر قاتىسىپ، باقتارىن سىنادى.

جەڭىمپازدار «مەنىڭ وتباسىم - مەنىڭ باقىتىم!»، «ون ساۋساعىنان ونەر تامعان...»، «كەلىن بولۋدىڭ سىرلارى»، «ۇلت تاربيەسىنىڭ ساقشىلارى» جانە «ونەرلىنىڭ ءورىسى كەڭ» سياقتى كەزەڭدەر بويىنشا انىقتالدى.



سايىس قورىتىندىسى بويىنشا ءتورت كەلىن «ونەرلى كەلىن»، «شەبەر كەلىن»، «كوركەم كەلىن» جانە «ءبىلىمدى كەلىن» اتالىمدارى بويىنشا جەڭىمپاز دەپ تانىلسا، سەلينوگراد اۋدانى اتىنان قاتىسقان كەلىن ءومىرحان رازىحان 3-دارەجەلى لاۋرەت اتاندى. ەكىنشى ورىندى ەرەيمەنتاۋلىق ءامينا وماروۆا، ءبىرىنشى ورىنعا ارشالىلىق ايدانا سەمبيەۆا يە بولدى. ال گران-پري تاعى ءبىر سەلينوگراد اۋدانىنىڭ كەلىنى جاننا ساريناعا بەرىلدى.

سوڭعى جاڭالىقتار