قاراعاندىدا بالالارعا روبوت جاساۋدى ۇيرەتەتىن تەحنوپارك اشىلادى

قاراعاندى. قازاقپارات - قاراعاندىدا بالالار مەن جاسوسپىرىمدەر سارايىندا تەحنوپارك اشۋ جوسپارلانۋدا.

وندا روبوتوتەحنيكا، استرونوميا، قۇراستىرۋ جانە ينجەنەرلىك نەگىزدەر بويىنشا ساباقتار وتەدى، دەپ حابارلايدى قازاقپارات وبلىس اكىمدىگىنىڭ سايتىنا سىلتەمە جاساپ.

تەحنوپاركتى قۇرۋ جانە جابدىقتاۋ ءۇشىن قالالىق بيۋدجەتتەن 14 ميلليون تەڭگە قاراجات ءبولىندى.

قازىر ماماندار بولاشاق تەحنوپاركتىڭ جوباسىن ازىرلەۋدە. قىركۇيەكتە وعان قاجەتتى جوندەۋ جۇمىستارىن جۇرگىزۋ ءۇشىن جانە قۇرال-جابدىقتار الۋعا بايقاۋ جاريالانادى. ال بارلىق جۇمىستار قاراشادا اياقتالىپ، اشىلادى دەپ كوزدەلگەن.

جاڭا تەحنوپاركتە جۇمىس ەكى نەگىزگى مودۋل بويىنشا جۇرەدى: عىلىمي-زەرتتەۋ جانە فۋنكسيونالدى.

 ءبىرىنشى بويىنشا ءارتۇرلى سەمينارلار مەن كونفەرەنسيالارعا قاتىسۋ، جاس زەرتتەۋشىلەردىڭ كىشى اكادەمياسى جانىنان قىزمەت ەتۋ، قىزىقتى استرونوميا جانە كوسموناۆتيكا بويىنشا ءبىلىم باعدارلاماسىن جۇزەگە اسىرۋ جوسپارلانعان. ول ءۇشىن ب ج س- دا موبيلدى پلانەتاري مەن جابدىقتالعان استرونوميالىق كەشەن ورناتىلماق.

 فۋنكسيونالدى مودۋل اياسىندا بىرنەشە زەرتحانادا ساباقتار وتكىزىلەدى، ونىڭ ىشىندە روبوتتەحنيكا زەرتحانالارىندا بولادى. سونىمەن قاتار بۇل جەردە وقۋشىلار ءارتۇرلى ماتەريالداردى قايتا وڭدەۋ تەحنولوگيالارىمەن تانىسۋ ءۇشىن جانە 3D مودەلگە دەيىنگى قايتا وڭدەۋ نوبايىن انىقتاۋدان باستاپ دايىن ءونىم قۇرۋ ءۇشىن ستانوكتار ورناتىلادى.

 «بۇل ساباقتارعا قابىلداۋ ادەتتەگىدەي، ءبىزدىڭ سارايدا جۇرگىزىلەدى. ۇيىرمەلەرگە 5 جاستان باستاپ جوعارى سىنىپ بالالارىن شاقىراتىن بولامىز. ساباقتاردىڭ باعاسى ءبىز جابدىقتاردى قانشاعا الاتىنىمىزعا بايلانىستى بولاتىن شىعار. ەگەر ساباقتار جارتىلاي اقىلى بولعاننىڭ وزىندە قۇنى قولجەتىمدى بولادى. ءبىز باسىندا وقۋشىلار مەن ۋوركشوپ فورماتى جانە شەبەرلىك ساباقتارى- قىسقا مەرزىمدى باعدارلامالارىنا باسىمدىق بەرەمىز دەپ ويلاپ وتىرمىز. ويتكەنى، بىرىنشىدەن، قاراشادا ورتالىق اشىلعاندا العاشقى تۇراقتى توپ قۇرۋ قيىنداۋ بولادى. ەكىنشىدەن، مۇنداي فورمات بىزگە الداعى ۋاقىتتا ۇزاق مەرزىمدى باعدارلامالارعا توپتار جيناۋ ءۇشىن وقۋشىلاردىڭ قىزىعۋشىلىعىن انىقتاۋعا كومەكتەسەدى»، - دەيدى بالالار مەن جاسوسپىرىمدەر سارايىنىڭ عىلىمي-ادىستەمەلىك جۇمىستار بويىنشا ديرەكتورىنىڭ ورىنباسارى مارينا يساينوۆا.

تەحنوپارك ورنالاساتىن اۋماق جابدىقتاردى ورناتۋعا دايىن. جاڭا ۇيىرمەلەر مەن تەحنيكالارعا ورىن جەتۋ ءۇشىن ب ج س اكىمشىلىگى كوركەمدىك- ەستەتيكالىق باعىتتار بويىنشا جانە مەكتەپكە دەيىنگى دامىتۋ توپتارىنا قابىلداۋدى ازايتۋعا تۋرا كەلگەن. الايدا بۇل توپتاردى جابۋدى جوسپارلاپ وتىرعان جوق، ويتكەنى ولار ب ج س كەلۋشىلەر اراسىندا سۇرانىسقا يە.