قىتاي ارمياسى كومانداسىنداعى قازاق بالۋانى سۇحبات بەردى - شەتەلدەگى قازاق ءتىلدى ب ا ق- قا شولۋ
شوپىرسىز اۆتوبۋس شيامىندە تۇڭعىش رەت جولاۋشىلاردىڭ پايدالانۋىنا بەرىلدى - «جەنمين جيباو»
«ابولۇڭ» دەپ اتالاتىن شاعىن ءتيپتى شوپىرسىز اۆتوبۋس ــجولاۋشىلاردى مىنگىزىپ الىپ شيامىن قالاسىنداعى شاعىناۋداننىڭ 3- كوشەسىندە كەتىپ بارادى، - دەپ حابارلايدى قىتايلىق People Daily اقپاراتتىق پورتالى.
جۇرگىزۋشىسىز «ابولۇڭ» اۆتوبۋسى سول كۇنى شيامىن قالاسىندا تۇڭعىش رەت جولاۋشىلاردىڭ پايدالانۋىنا بەرىلگەن ەكەن.
«اتالعان اۆتوبۋستىڭ ۇزىندىعى 4,3 مەتر، كەڭدىگى 2 مەتر، 14 ادام وتىرۋىنا بولادى. «ابولۇڭ» اۆتوماتتى تۇردە جول الماستىرىپ، بۇرىلا الادى. كولىك ىشىندە ءرۋلى مەن شوپىر وتىراتىن ورىندىعى جوق. بۇل كولىككە كوپتەگەن قالا تۇرعىندارى قىزىعۋشىلىق تانىتتى» دەپ جازادى اتالعان اقپارات قۇرالى.
800 ەكسپوناتى بار اسحانا مۇراجايى اشىلدى - TRT
كاحرامانماراشتا دۋلكاديروعولۋ مۋنيتسيپاليتەتى «اسحانا مۇراجايىن» اشتى دەپ حابارلايدى تۇركيا راديو تەلەۆيزيا پورتالى.
كاحرامانماراشتاعى مۇراجاي قالانىڭ 500 جىلدىق اسحانا مادەنيەتىن بولاشاق ۇرپاققا جالعاستىرادى. مۇراجايدا كاحرامانماراشتىڭ كۇندەلىكتى تۇرمىسىن كورسەتەتىن باقىر ىدىستار، قازاندار، شام، باسقا دا بۇيىمدار كەلۋشىلەردىڭ نازارىن وزىنە ەرەكشە اۋداراتادى.
مۇراجاي سول ءوڭىردىڭ ءداستۇرلى ۇيلەرىنىڭ بىرىندە اشىلعان. وسىلايشا ءوڭىر تۇرمىسى مەن اسحانا مادەنيەتى ءوز جەرىندە كورسەتىلۋدە.
TRT- نىڭ حابارلاۋىنشا، مۇراجايدا بارلىعى 800 ەكسپونات ساقتالعان. مادەني ورىننىڭ اسحانا بولىمىندە كەلۋشىلەرگە ىستىق سورپا مەن پالاۋ ۇسىنىلاتىنى تۋرالى ايتىلادى.
قازاقتىڭ ۇلتتىق ءان-بي تەاترى «اقساي ارمانىن» ساحنالادى - «جەنمين جيباو»
وسى اپتادا قىتايدىڭ گانسۋ ولكەسىنە قاراستى اقساي قازاق اۆتونوميالى اۋدانىنداعى كورمە ورتالىعىندا جەرگىلىكتى ارتىستەر «اقساي ارمانى» اتتى ۇلتتىق قويىلىمدى كورەرمەندەرىنە ۇسىنعان.
«قازاق ۇلتىنىڭ سالت- ءداستۇرلى ءان-بي تەاترى» دەپ اتالعان بۇل مادەني ۇجىمنىڭ ۇسىنعان وسى جولعى تۋىندىسى كورەرمەندەردىڭ ىستىق ىقىلاسىنا بولەندى دەيدى اتالعان اقپارات كوزى.
قازاقستان مەن يراننىڭ ساۋدا اينالىمىنىڭ كولەمى 70 پايىزعا ارتتى - «فارس» اقپارات اگەنتتىگى
ي ي ر-دىڭ قازاقستانداعى ەلشىسى قازاقستاننىڭ پرەمەر- مينيسترىمەن كەزدەسۋىندە اعىمداعى جىلدىڭ ءبىرىنشى جارتىسىندا تەھران مەن استانانىڭ ساۋدا اينالىمى كولەمىنىڭ ارتقانىن حابارلادى، دەپ جازادى Parstoday اقپارات اگەنتتىگى.
اتالعان اگەنتتىكتىڭ مالىمەتى بويىنشا، مودجتابا دەميرچيلۋ سەنبى كۇنى باقىتجان ساعىنتايەۆپەن كەزدەسۋىندە 2018 -جىلدىڭ قاڭتار- شىلدە ايلارى ارالىعىندا تەگەران مەن استانا اراسىنداعى ساۋدا اينالىمى كولەمىنىڭ 70 پايىزعا ارتقانىن مالىمدەگەن.
وسى مالىمەتكە سايكەس، ەكى جاق كەزدەسۋ بارىسىندا ءارتۇرلى تاقىرىپتاردى، سونىڭ ىشىندە جان- جاقتى ىنتىماقتاستىقتاردى ودان ءارى دامىتۋدى، اسىرەسە ەكى ەل اراسىنداعى ساۋدا- ساتتىق، ەكونوميكا، ينۆەستيتسيا سالۋ، ونەركاسىپ پەن تاۋار ءترانزيتى جانە تاسىمالداۋ ماسەلەلەرىن تالقىلاعان. «ولار سونداي- اق، جەر استى جانە اۋىل شارۋاشىلىعى شوگىندىلەرىن پايدالانۋ جايلى دا كەڭەستى. دەميرچيلۋ قازاقستان بۇگىندە ەۋرازياداعى كوشباسشى ەلدىڭ ءبىرى بولعاندىقتان تەگەران باسشىلارىنىڭ وسى ەلمەن ىنتىماقتاستىققا ەرەكشە ماڭىزدىلىق بەرىپ وتىرعانىن ايتتى» دەپ تۇيىندەيدى parstoday.com.
چيڭحاي ولكەسىندەگى ەسكى مولاداعى ەجەلگى مۇراعاتتار ۇرلانعان - «جەنمين جيباو»
قىتايدىڭ ىشكى ىستەر مينيسترلىگىنىڭ باسشىلىعىنداعى چيڭحاي ولكەلىك ىشكى ىستەر ورگانى حىنان، سانشي، جىجياڭ، ءيۇننان سەكىلدى ءبىرقاتار ولكەلەردەگى ارىپتەستەرىمەن بىرلەسىپ جاقىندا چيڭحاي ولكەسى دۋلان اۋدانىنداعى ەسكى مولاداعى ەجەلگى مۇراعاتتاردى ۇرلاۋ فاكتىسىن انىقتاعان.
«مۇراعاتتاردى ۇرلاعان، ۇرلاۋعا قارجى شىعارعان، ولاردى ساتۋعا بايلانىس جاساعان جانە ساتقان ءار ءتۇرلى قىلمىس بويىنشا كۇدىكتىلەر رەتىندە 26 ادامدى ۇستاپ، 646 دانا كونە مۇراعاتتى قايتارىپ اكەلدى. سونداي-اق، مۇراعاتتاردى ۇرلاۋشىلاردى قاتاڭ جازالاپ، ەل ىشىندەگى تاريحي مۇرالاردىڭ قاۋىپسىز ساقتالۋىنا مۇمكىندىك جاراتتى»، - دەپ جازادى kazakh.people.com اقپارات كوزى.
قىتايدىڭ ۇلتتىق ارمياسى كومانداسىنداعى قازاق بالۋانى سۇحبات بەردى - قىتايدىڭ «ورتالىق حالىق راديوسى» (CNR)
قىتايدىڭ ەڭ نەگىزگى ۇلتتىق ارمياسى ازاتتىق ارميا اتىنان مەملەكەتتىك، حالىقارالىق جارىستارعا قاتىسىپ، بۇكىل اسكەريلەردىڭ نامىسىن قورعاپ جۇرگەن قازاق ازاماتى ءالمۇرات دارۋباي ۇلىنىڭ قىتايداعى «ورتالىق حالىق راديوسىنىڭ» الەۋمەتتىك جەلىسىندە ۆيدەو- سۇحباتى جاريالاندى.
سۇحبات بارىسىندا ءالمۇرات جاتتىعۋلارى، جاقىندا قاتىسقان اسكەريلەردىڭ حالىقارالىق چەمپيوناتى تۋرالى، بالۋاندىقتىڭ قىر- سىرى جايىندا كەڭىنەن اڭگىمەلەيدى. تاياۋ ۋاقىت عانا بۇرىن ماكەدونيادا وتكىزىلگەن اسكەريلەردىڭ الەمدىك سپورت باسەكەسىندە قىتايلىق ارميا اتىنان قاتىسقان بالۋاندار قۇراماسىندا وسى جارىسقا بارىپ قايتقان ءۇش قازاق ازاماتىنىڭ ءبىرى - ءالمۇرات.
ودان باسقا مۇراتبەك، قۋاتبەك ەسىمدى ەكى قازاق بالۋانى كوماندا ساپىندا ونەر كورسەتكەنىن جازادى اتالعان اقپارات كوزى.
ءالمۇرات دارۋباي ۇلى 2013 -جىلى شاندۇڭدا گرەك-ريم كۇرەسىنەن مەملەكەتتىك چەمپيوناتتا 96 كەلى بويىنشا ءۇشىنشى، 2014 -جىلى جيناندا جاستاردىڭ مەملەكەتتىك چەمپيوناتىندا 98 كەلى سالماق بويىنشا باس جۇلدەنى قانجىعالاسا، 2015 -جىلى ىشكى موڭعولدا گرەك-ريم كۇرەسىنەن حالىقارالىق چەمپيوناتتا 98 كەلى بويىنشا باس جۇلدەگەر، 2016 -جىلى سانشيدە گرەك-ريم كۇرەسىنەن مەملەكەتتىك چەمپيوناتتا 98 كەلى بويىنشا تاعىدا باس جۇلدەنى ەنشىلەگەن بولاتىن. ول قازىر دە ازاتتىق ارميا اتىنان جارىسقا قاتىناسىپ تۇرادى.
«بالۋاندىق قازاق ۇلتىنىڭ قانىندا بار ونەر، قاجىمۇقان، بالۋان شولاقتاردىڭ ءىزىن باسىپ، كۇش پەن تەحنيكانىڭ، اقىل مەن ونەردىڭ ۇزدىك ۇلگىسىن كورسەتىپ جۇرگەن بالۋاندارىمىز قانشاما. برازيليادا وتكەن وليمپياداعا ەلىمىز اتىنان قاتىناسقان ەرلانبەك كاتەي ۇلى ءبارىمىزدى قۋانتىپ، الار اسۋىنىڭ ءالى الدا ەكەنىن كورسەتتى. جۋىردا عانا شىنجاڭداعى موڭعولكۇرە اۋدانىندا قازاق كۇرەسىنەن الەمدىك دەڭگەيدە VI چەمپيونات وتكىزىلىپ، ەۋرازيا مەن افريكاداعى 22 مەملەكەتتەن كەلگەن 100-دەن استام بالۋان باعىن سىناپ، قازاق كۇرەسىنىڭ مەرەيىن اسىردى. بۇگىن سۇحباتىمىزعا كەلىپ وتىرعان ءالمۇرات سىندى جاس بالۋاندارىمىز دا، ەرتەڭ اعالارىنىڭ جولىن قۋىپ، بيىك بەلەستەردى باعىندىرادى دەپ سەنەمىز» دەپ تۇيىندەيدى cnr.cn اقپارتتىق پورتالى.
اۆتورى: بەيسەن سۇلتان ۇلى