ەلوردادا «اباي الەمى» اتتى ادەبي-سازدى كەش ءوتتى

None
None
استانا. قازاقپارات - 23- تامىز كۇنى استانا قالاسىندا «رۋحاني جاڭعىرۋ» باعدارلاماسى اياسىندا اباي قۇنانباي ۇلىنىڭ تۋعان كۇنىنە ارنالعان «اباي الەمى» اتتى ادەبي-سازدى ءىس- شاراسى ءوتتى، دەپ حابارلايدى استانا قالاسى اكىمدىگىنىڭ رەسمي سايتى.

ءىس- شارانى استانا قالاسىنىڭ تىلدەردى دامىتۋ جانە ارحيۆ ءىسى باسقارماسى اباي ەسكەرتكىشىنىڭ الدىندا وتكىزدى. شارانىڭ باستى ماقساتى - وسكەلەڭ ۇرپاققا تاعىلىم رەتىندە ابايدىڭ رۋحىنا تاعزىم ەتۋ، ابايدىڭ رۋحاني قۇندىلىقتارىن كورسەتە وتىرىپ، ادەبي مەكتەبىن، ءتىل مەكتەبىن، ۇلت پەن رۋح مەكتەبىن اشۋ، ۇلى اقىننىڭ مۇراسىن جاستاردىڭ ساناسىنا ءسىڭىرۋ.

ابايدىڭ تۋعان كۇنىنە ارنالعان ءىس- شارا ەڭ الدىمەن اباي ەسكەرتكىشىنە گۇل قويۋ راسىمىمەن باستالدى. ادەبي- سازدى كەشتىڭ شىمىلدىعىن استانا قالاسى اكىمىنىڭ ورىنباسارى ەرمەك امانشايەۆ پەن اقىن نەسىپبەك ايت ۇلى اشتى.

«اباي قازاق رۋحانياتىنىڭ جارىق جۇلدىزى، ءار زاماندا تۇلەپ، جاڭارىپ وتىرادى. اباي - ءوز زامانىن جاڭعىرتقان، جاڭارتقان اقىن. اباي حالقىن ۇلى مادەنيەتكە، ۇلى رۋحانياتقا شاقىردى»، دەدى اقىن، مەمەلەكەتتىك سىيلىقتىڭ لاۋرەاتى نەسىپبەك ايت ۇلى.

ءىس-شارا بارىسىندا قازاقستان رەسپۋبليكاسىنىڭ ەڭبەك سىڭىرگەن ءارتىسى كەنجەعالي مىرجىقباي، ءداستۇرلى ءان ءدۇلدۇلى ەرلان رىسقالي وزگە دە ەلوردا ونەرپازدارى اباي اندەرىن ورىندادى.

«ءبىز اباي اتامىزدىڭ رۋحاني مۇراسىنا قايتا-قايتا ورالىپ، ونىڭ تەرەڭ تۇڭعيىعىنا باتا تۇسەمىز. سەبەبى ۇلى ويشىل اتامىز شىعىس پوەزياسىندا قالىپتاسقان ۇلى داستۇرلەردى جالعاستىرۋشى عانا ەمەس فەردوۋسي، زينامي، الىشەر ناۋاي سەكىلدى شىعىستىڭ ۇلى ويشىلدارىنىڭ ءىزباسارى، رۋحاني ويدى ودان ارى دامىتۋشى. ادامزات وركەنيەتىنە ءوز ۇلەسىن قوسقان ۇلى قايراتكەر»، دەدى ەرمەك امانشايەۆ.

سونىمەن قاتار، كەشتە استانا قالاسى مەملەكەتتىك اكادەميالىق فيلارمونياسىنىڭ قازاق وركەسترى قازاق كۇيلەرى مەن ءتۇرلى كومپوزيتسيالار تارتۋ ەتىپ، تانىمال كۇيشى ايبەك بەكبوسىن ابايدىڭ كۇيىن شەرتتى، ابايدىڭ وبرازى سومدالىپ، مونولوگتار وقىلدى، جاس اقىندار اباي ولەڭدەرىن جانە اقىنعا ارنالعان ءوز جىرلارىن وقىدى.

سونداي-اق، كوپشىلىككە ارنالىپ اشىق اسپان استىندا «ابايدىڭ مۇراسى - قازاقتىڭ ەڭ اسىل قازىناسى» اتتى كىتاپ كورمەسى ۇيىمداستىرىلدى.

حاكىم ابايدىڭ تۋعان كۇنىنە ارنالعان شاراعا زيالى قاۋىم وكىلدەرى، ارداگەرلەر مەن اقساقالدار، قالا باسشىلىعى، وقۋ ورىندارىنىڭ، قوعامدىق بىرلەستىكتەر مەن جاستار ۇيىمدارىنىڭ جەتەكشىلەرى مەن وكىلدەرى جانە قالا تۇرعىندارى مەن قوناقتارى قاتىستى.

سوڭعى جاڭالىقتار