شەتەلدەن قانداستاردى شاقىرعان ەكەنبىز، دۇرىس جاعداي جاسالۋى ءتيىس - دانيال احمەتوۆ

وسكەمەن. قازاقپارات - شىعىس قازاقستان وبلىسىنىڭ اكىمى دانيال احمەتوۆ وڭىردە ەڭبەك ميگراتسياسىن رەتتەۋ جانە ورالمانداردى قابىلداۋ جۇمىستارى سالعىرت ءجۇرىپ جاتقانىن سىنعا الدى، دەپ حابارلايدى قازاقپارات ءتىلشىسى.

بۇل ماسەلە بۇگىن وبلىس اكىمدىگىنىڭ كەزەكتى ماجىلىسىندە تالقىلاندى. «ءونىمدى جۇمىسپەن قامتۋ-2020» باعدارلاماسىنىڭ اياسىندا شىعىس قازاقستانعا بيىل 714 وتباسى كوشىپ كەلۋى ءتيىس. اتالمىش كۆوتانىڭ 364ءى تۇركىستان، قىزىلوردا، ماڭعىستاۋ، الماتى وبلىستارىنان قونىس اۋدارۋشىلارعا بولىنسە، قالعان 350 ءى شەتەلدىك قانداستاردىڭ وتباسىلارىنا ارنالعان. سەگىز ايدىڭ ىشىندە اتالمىش كۆوتا 36,2 پايىزعا عانا ورىندالعان. وبلىستىق جۇمىسپەن قامتۋ جانە الەۋمەتتىك باعدارلامالاردى رەتتەۋ باسقارماسىنىڭ باسشىسى ەلەنا ستارەنكوۆا قونىس اۋدارۋشىلاردى قابىلداۋعا جاۋاپتى اۋدانداردىڭ سىلبىرلىعى كوشتى تەجەپ تۇر دەگەن پىكىر ءبىلدىردى.

«اسىرەسە، سەمەي جانە كۋرچاتوۆ قالالارى، اباي، اياگوز، زايسان، كوكپەكتى، كۇرشىم، تارباعاتاي، ءۇرجار اۋداندارى بەلگىلەنگەن كۆوتانى يگەرمەي وتىر» - دەدى ەلەنا ستارەنكوۆا.

دانيال احمەتوۆ باسقارما باسشىسىنا اتالمىش ماسەلەگە مۇقيات بولۋدى تاپسىردى.

«اۋەلى ءسىزدىڭ وزىڭىزگە جۇمىس ءتاسىلىن وزگەرتۋ كەرەك. بولىنگەن كۆوتانىڭ ناقتى قانداي اۋىلدىق وكرۋگكە بەرىلگەنىن بىلمەي وتىرسىز. جۇمىسقا بۇلاي سالعىرت قاراۋعا بولمايدى. كوشى- قون دەگەنىڭىز - مەملەكەتتىك ماسەلە. ءبىزدىڭ كاتونقاراعاي اۋدانىندا جىل سايىن حالىق ازايىپ بارادى. ال سىزدەر بولىنگەن كۆوتانىڭ ءوزىن يگەرە الماي وتىرسىزدار. اۋىلدى دامىتۋعا بولىنگەن 3,5 ميلليارد تەڭگەنىڭ نەسيەسىن 30 پايىز عانا يگەرگەنسىزدەر. ايتەۋىر يگەرە المايدى ەكەنسىزدەر، سول اقشانى كوشىپ كەلەتىن وتباسىلارعا باعىتتاڭىزدار. ونسىز دا ەل اۋىلدان ۇدەرە كوشۋدە. ال ءبىز قول قۋسىرىپ، قاراپ وتىرمىز. اتالمىش كۆوتا گلۋبوكوە، شەمونايحا، زىريان اۋداندارى مەن ريددەر قالاسىندا كوپتەپ ءبولىنۋى ءتيىس. نەمقۇرايلىلىقتى قويىپ، وسى باعىتتا جۇمىس ىستەڭىز» - دەدى ايماق باسشىسى.

كەرى كەتكەن كوشتى دۇرىس ارناعا بۇرۋ ءۇشىن ەندى ءار اۋدانداعى بوس ۇيلەردىڭ ءتىزىمى جاسالىپ، ونى مەملەكەت مەنشىگىنە ساتىپ الۋ جانە جوندەۋ جۇمىستارى ۇيىمداستىرىلماق. سودان كەيىن عانا ءار اۋدانعا بوس ۇيلەردىڭ سانىنا بايلانىستى كۆوتا بولىنەتىن بولادى. ال كوشىپ كەلگەن وتباسىلاردى جۇمىسپەن قامتۋ ءۇشىن مەملەكەتتىك جەر قورىنان ەگىندىك پەن جايىلىم تەلىمدەرى بولىنەدى. شاعىن نەسيە ارقىلى مال ساتىپ الۋعا دا جول اشىلماق.

«شەتەلدەن قانداستاردى شاقىرۋ جەتكىلىكسىز. شاقىرعان ەكەنبىز، دۇرىس جاعداي جاسالۋى ءتيىس. تۇراتىن باسپاناسى، بالا- شاعاسىن اسىرايتىن كاسىبى، جايىلىم مەن ەگىندىك جەرى بولۋى ءتيىس. ال وزگە وڭىرلەردەن كەلەتىن وتباسىلاردى كوشىرىپ الۋ ءۇشىن تارباعاتاي اۋدانىنىڭ تاجىريبەسىن پايدالانۋعا بولادى. كوشىپ كەلەتىن جانۇيانىڭ ارقايسىمەن جەكە تانسىپ، جۇمىس ىستەۋگە نيەتى بار ادامداردى ءبىرىنشى كەزەكتە اكەلۋ قاجەت» - دەدى دانيال احمەتوۆ.