نۇرسۇلتان نازاربايەۆ: قازاقستان جاڭا جاعدايعا بەيىمدەلدى
«سىرتقى فاكتورلارعا قاراماستان، 4 پروتسەنت كولەمىندە تۇراقتى ءوسۋ ءۇردىسى ساقتالىپ وتىر. قازاقستان جاڭا جاعدايعا بەيىمدەلىپ، دايەكتى رەفورمالاردى جۇرگىزۋدى جالعاستىرىپ كەلەدى. زاماناۋي تالاپتارعا ساي بولۋ ءۇشىن سيفرلاندىرۋ جانە ادامي كاپيتال ساپاسىن ارتتىرۋعا باعىتتالعان مەملەكەتتىك جوبالار جۇزەگە اسىرىلۋدا. وسىعان وراي، ەلىمىزدە قولايلى ينۆەستيتسيالىق احۋال قالىپتاسىپ، شەتەلدىك وزىق تەحنولوگيالار مەن كاپيتالدى تارتۋ كوزدەلىپ وتىر»، - دەدى ن. نازاربايەۆ بۇگىن ەلشىلەردىڭ سەنىم گراموتالارىن تاپسىرۋ راسىمىندە.
پرەزيدەنتتىڭ ايتۋىنشا، بۇگىندە قازاقستان كورشىلەر ەلدەرمەن، سونداي-اق ەۋروپا مەن ازيا اراسىنداعى نارىقتىق قاتىناستاردى جانداندىرۋعا قاجەتتى زاماناۋي ينفراقۇرىلىم قالىپتاستىردى. «اتاپ ايتقاندا، «باتىس قىتاي - باتىس ەۋروپا» حالىقارالىق اۆتوكولىك ءدالىزىنىڭ 3 مىڭ شاقىرىمعا جاقىن قازاقستاندىق بولىگىنىڭ قۇرىلىسى اياقتالدى. جاقىندا اقتاۋ قالاسىندا وتكەن 5- كاسپي سامميتىندە كاسپي توڭىرەگىندە بەس ەلدىڭ قۇقىقتىق مارتەبەسى تۋرالى كونۆەنتسياعا قول قويىلدى. كونۆەنتسيادا قاۋىپسىزدىك پەن ەكولوگيا ماسەلەلەرىمەن قاتار كاسپي ماڭى ەلدەرىنىڭ كولىك ينفراقۇرىلىمىن دامىتۋ، ترانزيتتىك الەۋەتىن ارتتىرۋ قاراستىرىلعان. جاڭادان سالىنعان قۇرىق پورتى ارقىلى ترانسكاسپي باعىتتاعى جۇك تاسىمالدارىنىڭ ءتيىمدى لوگيستيكاسى قالىپتاسادى. قازىردىڭ وزىندە قازاقستاننىڭ ونىمدەرى الەمنىڭ 120 ەلىنە جەتكىزىلىپ وتىر»، - دەپ اتاپ كورسەتتى مەملەكەت باسشىسى.
ايتا كەتەيىك، بۇگىن اقوردادا ۋكراينا، ليۆان، برازيليا، گەرمانيا مەن پاكىستان ەلشىلەرى قر پرەزيدەنتىنە سەنىم گراموتالارىن تاپسىردى.