مۇنداي كليپ بولعان ەمەس: عالىمجان مولدانازاردىڭ جاڭا بەينەبايانى كوپشىلىكتىڭ جوعارى باعاسىن الدى

 استانا. قازاقپارات - وتاندىق ءانشى عالىمجان مولدانازار جاڭا بەينەبايانىن تاسپالاپ، كوپشىلىكتىڭ جوعارى باعاسىن الدى.

ەرەكشە تۋىندىعا ءتانتى بولعان تىڭدارماندار «بۇعان دەيىن مۇنداي بەينەبايان بولعان ەمەس» دەسىپ جاتىر.

ءانشى ءانى مەن ءسوزىن ءوزى جازعان «ەسىمدە ءبارى» دەپ اتالاتىن انىنە بەينەبايان تۇسىرگەن.

عارىش تاقىرىبىنا ارنالعان جاڭا تۋىندىدا «عارىشكەر بولسام» دەگەن بالا ارمانى كورىنىس تابادى.

سەناريىن سانجار عالىمجانوۆ جازىپ، بەكەنتاي اجىبەكوۆ رەجيسسەرلىك ەتكەن بەينەبايان ءوزىنىڭ ساپالىلىعىمەن كوپشىلىكتىڭ نازارىنا بىردەن ءتۇستى.

ءوز كەزەگىندە مولدانازاردىڭ تىڭدارماندارى تۋىندىعا جوعارى باعا بەرىپ، ءانشىنى «الەمدىك دەڭگەيدەگى مۋزىكانت» دەپ اتاپ جاتىر.

«الەمدىك دەڭگەيگە شىعۋعا تۇرارلىق بەينەبايان»، «قانداي كەرەمەت، ساپالى جۇمىس. بىزدە مۇنداي بەينەبايان بولماعان. وسى بەينەباياننىڭ تۇسىرىلىمىنە اتسالىسقانداردىڭ بارىمەن قول الىسقىم كەلەدى. جانە جەكە مولدانازاردىڭ وزىنە العىس بىلدىرگىم كەلەدى»، «قانداي پروگرەسس. مولدانازار، «وردا» جانە «91» توبىنداعى ارتىستەرمەن ءبىر زاماندا ءومىر ءسۇرىپ جاتقانىما ماقتانامىن. مولدانازار -  الىپ»، «مولدانازار بالا كۇنىندە عارىشكەر بولعىسى كەلگەن بولار. بۇل ناعىز ساپالى، ۇزدىك تۋىندى. بۇل جوعارى دەڭگەي»، -  دەپ جازۋدا پىكىر قالدىرۋشىلار.

ايتا كەتسەك، «ەسىمدە ءبارى» بەينەبايانى 4 كۇننىڭ ىشىندە 53 مىڭنان اسا تاماشالانعان.