فۋتزالدان الەم چەمپيوناتى: قازاقستان توپتىق كەزەڭنەن شىقتى

الماتى. قازاقپارات - 21 -تامىزدا الماتىدا ءوتىپ جاتقان فۋتزالدان ستۋدەنتتەر اراسىنداعى الەم بىرىنشىلىگىنىڭ توپتىق كەزەڭىنىڭ جەڭىمپازدارى بەلگىلى بولدى، دەپ حابارلايدى قازاقپارات ءتىلشىسى wucfutsal2018.com سايتىنا سىلتەمە جاساپ.

اتالمىش جارىستا ۆ توبىندا سىنعا تۇسكەن جىگىتتەر ءوز توبىندا ءبىرىنشى ورىن الدى. ولار الدىمەن چەحيانى 4:3، جاڭا زەلانديانى 2:0 ەسەبىمەن تىزە بۇكتىرسە، بەلارۋسپەن 1:1 ەسەبىمەن تەڭ وينادى. ءبىزدىڭ توپتان ەكىنشى ورىنعا چەحيا قۇراماسى يە بولدى. ولار قازاقستان قۇراماسىنان باسقا وزگە ويىنداردا بەلارۋستى 3:1، جاڭا زەلانديانى 10:0 ەسەبىمەن جەڭدى.

ال ا توبىندا رەسەي مەن ارگەنتينا، س توبىندا ۋكراينا مەن تايلاند، د توبىندا پورتۋگاليا مەن پولشا جارىستى جالعاستىرۋ مۇمكىندىگىنە يە بولدى.

ەندى ءار توپتان العاشقى ەكى ورىنعا يە بولعاندار شيرەك فينالعا شىقسا، سوڭعى ەكى ورىنداعى قۇرامالار 9-16 -ورىندار ءۇشىن سايىسقا تۇسەدى. ال جارتىلاي فينال 24 -تامىزدا وتكىزىلسە، فينال مەن 3-ورىن ءۇشىن باسەكە 26 -تامىزدا بولادى.