الماتىدا قوشقار كوتەرۋدەن جاڭا رەكورد ورناتىلدى
الماتىنىڭ ورتالىق مەشىتىندە اسىل مۇرا باعدارلاماسى اياسىندا مۇسىلمانداردىڭ مەرەكەسى قۇربان ايتقا ارنالىپ ۇلتتىق سپورت تۇرلەرىنەن جارىستار ءوتتى.
بۇل شارانى تاڭعى ايت نامازىنا كەلگەن 4,5 مىڭ ادام تاماشالادى. كەز كەلگەن قاتىسۋشى وزدەرىن قوشقار كوتەرۋ، قول كۇرەس، باعاناعا شىعۋ جانە اسىق اتۋدان سىناپ كوردى.
جەڭىمپازدار مەن جۇلدەگەرلەر باعالى سىيلىقتار، سونداي-اق، قوشقار كوتەرۋ جۇلدەگەرلەرى 40 كەلى قوشقارلارعا يە بولدى. ونىڭ ەكەۋى 505 جانە 510 رەت كوتەرگەن جاس پالۋاندار باۋىرجان ءابدىحايىم مەن يلياس جۇمايعا بۇيىردى.
«مەن قاتىسايىن با جوق پا دەپ كوپ ويلاندىم. سەبەبى الدا رەسەيدە جارىس كۇتىپ تۇر. ءبىراق 505 دەگەندى كورىپ، جىگەرلەنىپ، قاتىسۋعا بەل بۋدىم. وسىلايشا 510 رەت كوتەرىپ ءوزىم ءۇشىن رەكورد ورناتتىم. مەن ءارقاشاندا ءوز قارسىلاسىمدى جەڭۋگە تىرىساتىن اداممىن. ەگەر ول قوشقاردى 600 رەت كوتەرگەندە، مەن 605-كە جەتكىزۋگە تالپىناتىن ەدىم»، - دەيدى ەركىن كۇرەستەن قازاقستان ۇلتتىق قۇراماسىنىڭ مۇشەسى يلياس جۇماي.
يلياس جۇماي وسىنىڭ الدىندا، ەكى اي بۇرىن وسى باعدارلامانىڭ اشىلۋىندا دا ءدال وسىنداي قوشقاردى 205 رەت كوتەرىپ ۇتىپ العان بولاتىن. ول كۇرەسپەن 8 جاسىنان باستاپ اينالىسىپ، ەلىمىزدىڭ ابىرويىن كوپتەگەن حالىقارالىق جارىستاردا قورعاپ ءجۇر.
ايتا كەتۋ كەرەك، بۇگىنگى شارانىڭ قوناقتارىنا جارىستاردان بولەك ارنايى داستارحان جايىلىپ، بالالارعا تاتتىلەر تاراتىلدى. «اسىل مۇرا» باعدارلاماسى قالاداعى مەشىتكە كەلۋشى جاماعاتتار اراسىندا بۇقارالىق سپورتتى دامىتۋعا باعىتتالعان.