نۇرسۇلتان نازاربايەۆ استاناداعى «ازىرەت سۇلتان» مەشىتىنە باردى
«قۇرمەتتى وتانداستارىم! بارشالارىڭىزدى بۇگىنگى مۇسىلمانداردىڭ ۇلىق مەرەكەسى - قۇربان ايت كۇنىمەن قۇتتىقتايمىن. مەنىڭ جارلىعىممەن بۇل كۇن بۇكىل مۇسىلماندارعا، حالقىمىزعا، قازاقستانعا جۇمىستان ەلدەر بوساتىلىپ، وسى نامازىن، پارىزىن ورىنداسىن دەپ، مەيرام دەپ جاريالانعان. وسى ايلاردىڭ ىشىندە حالقىمىز ناماز وقىپ، قۇلشىلىق جاساپ، اللادان تىلەك تىلەدى. «قۇربان» دەگەن ءسوز - اللاعا جاقىنداۋ دەگەن ءسوز. قولىنان كەلەتىن ازاماتتار قۇربان شالىپ، تىلەگىن تىلەپ جاتىر. بۇل - اللانىڭ كورسەتكەن جولى، پايعامباردىڭ ءىزى. ءارقايسىڭىز ەلدىڭ تىنىشتىعىن، بالا-شاعانىڭ امانشىلىعىن بولاشاقتا ويلاپ، ناماز وقىپ، تىلەۋ تىلەگەن شىعارسىزدار. سول تىلەكتىڭ بارلىعى ەلىمىزدە ورىندالسىن»، - دەدى پرەزيدەنت قۇتتىقتاۋىندا.
ەلباسى ءوز سوزىندە قۇربان ايت - قازاقتىڭ داستۇرىمەن ۇندەس مەرەكە ەكەنىن اتاپ ءوتتى.
«بۇل بىرىنشىدەن، ەلدىڭ بىرلىگى، بولاشاعى، ەكىنشىدەن يمان، قاناعات، قايىرىمدىلىق دەگەندى بىلدىرەدى. بۇل كۇندەرى اعايىن-تۋىسقان ءبىر-بىرىمەن قاۋىشىپ، ءبىر-ءبىرىنىڭ ۇيىندە ءدام تاتىپ، كەمتارلارعا كومەكتەسىپ، جاقسىلىق جاسايدى. وسى كۇنى قازاقتىڭ ازاماتتارى «رۋحاني جاڭعىرۋ» باعدارلاماسىمەن ءوزىنىڭ تۋعان جەرىنە، اۋىلىنا جاقسىلىق جاساپ، قاراجاتىن سالىپ، اۋرۋحانا، بالاباقشا، مەكتەپ بارلىعىن جاساپ جاتىر. وسى قايىرىمدىلىق تا ساۋاپتى بولادى دەپ ەسەپتەيمىز. ونى جالعاستىرا بەرۋ كەرەك»، - دەدى نۇرسۇلتان نازاربايەۆ.
پرەزيدەنت سونىمەن بىرگە، ەڭ باستىسى ەلىمىزدىڭ بىرلىگى ەكەنىن اتاپ ءوتتى.
«مۇسىلماندىق دەگەن - قانداي ۇلت بولسىن بارلىق مۇسىلماندار ءبىر- بىرىمەن باۋىر-تۋىسقان بولىپ سانالادى. سونى ۇمىتپاۋىمىز كەرەك. وسى قاعيداتتى ءبىز دە ۇستاپ كەلە جاتىرمىز. جاقىن ارادا بىزدە دۇنيەجۇزىلىك دىندەر باسشىلارىنىڭ التىنشى سەزى وتەتىن بولادى. قازاقستانىمىزدىڭ جەرى قاسيەتتى دەپ، ەلدىڭ ءبارى جينالادى. سەبەبى، بىزدە بىرلىك بار، اۋىزبىرشىلىك بار، ءبىر-ءبىرىن سىيلاۋ، قۇرمەتتەۋ بار. قادىرلەيدى ءبىزدىڭ حالقىمىزدى. قورىقپاي كەلىپ، وزدەرىنىڭ جۇمىستارىن اتقارادى. سوندىقتان، قۇربان ايت قۇتتى بولسىن. قۇربان شالۋ - تەك قانا قولىنان كەلەتىن ازاماتتاردىڭ جاسايتىن ءىسى بولادى. قۇربان مەرەكەسى - تەك قۇربان شالۋمەن اياقتالمايدى، قاي جەردە جۇرسە دە ادامنىڭ نيەتى، كوڭىلى تازا ءجۇرۋ كەرەك. سوندا بارلىعى قابىل بولادى. دەنساۋلىق، بالا-شاعاڭىزعا، جانۇياڭىزعا بەرەكە-بىرلىك، باياندى بولاشاق تىلەيمىن»، - دەپ ءتۇيدى پرەزيدەنت.
ايتا كەتسەك، بۇگىن مۇسىلمانداردىڭ قاسيەتتى مەرەكەسى - قۇربان ايت باستالدى.