گەرمانيانىڭ ازاماتى قازاقستانعا ۆەلوسيپەدپەن ساياحاتتاپ كەلدى
قازاقستانداعى گەرمانيانىڭ ەلشىلىگى ءوزىنىڭ Facebook الەۋمەتتىك جەلىسىندەگى پاراقشاسىندا 21 جاستاعى ساياحاتشى جايلى جازبا قالدىردى.
«دوستار، ۆەلوسيپەدپەن الەمدى شارلاۋعا بەل بۋار ما ەدىڭىز؟ ال 21 جاستاعى فەرري ۆايكەرت ۆەلوسيپەدپەن ساياحاتتاپ، ول جايىندا ءوزىنىڭ @bike_the_world پاراقشاسىندا جازىپ وتىرادى. جاقىندا ول قىزىلورداعا كەلىپ، سول جەردە تۇراتىن سامات ەسىمدى جىگىتپەن تانىستى. جەرگىلىكتى تۇرعىن ونى قوناققا شاقىرىپ، قازاقتىڭ ۇلتتىق تاعامدارىنان ءدام تاتقىزىپ، قالانى كورسەتىپتى! فەرري قازاقتىڭ قوناقجايلىعىنا ءتانتى بولدى! وسىلاي ءبىر ادام ارقىلى بۇكىل ەلمەن، مادەنيەتپەن، داستۇرمەن تانىسىپ شىعۋعا بولادى»، - دەپ جازىلعان جازبادا.
فەرري ۆايكەرت ساياحاتتاپ بارعان ءار ەلىن Instagram جەلىسىندەگى پاراقشاسىنا سالادى. قازاقستان ساياحاتشىنىڭ ۆەلوسيپەدپەن كەلگەن التىنشى ەلى ەكەن.
«ءنومىرى التىنشى ەلگە قوش كەلدىڭىز: قازاقستان»، - دەپ جازدى ول پاراقشاسىندا.
«مەنىڭ قازاقستانمەن كەزدەسۋدەگى العاشقى اسەرىم ويىمنان شىقتى. وسىنداي پەيزاجعا جەتكەنىم ءۇشىن وتە قۋانىشتىمىن»، -دەيدى فەرري ۆايكەرت.
ول ءبىزدىڭ ەلگە ساياحاتقا 2018-جىلدىڭ 20- مامىرىندا شىققان.