قازاقستاندىقتار قاسيەتتى مەككەدەگى دۇلەي داۋىلدى قالاي وتكەرگەنىن ايتىپ بەردى

 استانا. قازاقپارات - جەكسەنبى كۇنى قاسيەتتى مەككەدە دۇلەي قۇمدى داۋىل تۇردى. بۇل كەزدە قاجىلىقتا جۇرگەن قازاقستاندىقتار الەمنىڭ باسقا دا مەملەكەتتەرىنەن كەلگەن مۇسىلماندارمەن بىرگە تابيعاتتىڭ توسىن قۇبىلىسىنا كۋا بولدى، دەپ حابارلايدى «ك ت ك» ارناسى.

مەككەدەگى قۇمدى داۋىل قۇلشىلىعىن وتەۋگە كەلگەن مۇسىلمانداردىڭ زارەسىن الدى. قاتتى جەل شاتىر، ۇستەل، قوقىس جاشىكتەرى، قورشاۋلار مەن جول بەلگىلەرىن قۇلاتىپ جاتتى. تابيعاتتىڭ توسىن قۇبلىسىنان شوشىعان جۇرتشىلىق تىعىلىپ، جان ساقتاۋعا تىرىستى.

قولايسىز اۋا رايىنا قازاقستاندىق مۇسىلماندار دا كۋا بولدى. كۋاگەرلەردىڭ سوزىنشە، قاتتى قورىققانىمەن، يمانى كۇشتىرەك بولىپ شىققان. وقيعا كەزىندە ەشكىم قاجىلىعىن توقتاتپاپتى.

«كەشە داۋىل بولدى. ءبىز ارەڭ اياق الىپ جۇردىك. اللاعا شۇكىر، ەشكىم زارداپ شەككەن جوق. ءبارى امان- ەسەن. جانىمىزدا ۇنەمى دارىگەرلەر ءجۇر»، - دەيدى قازاقستان مۇسىلماندارى ءدىني باسقارماسىنىڭ نايب-ءمۇفتيى باۋىرجان ەسماحان.

سينوپتيكتەر دۇلەي داۋىل دۇيسەنبى كۇنى قايتالانا ما دەپ قورىققان ەدى. ءدال وسى كۇنى قاجىلىققا اتتانعاندار قاسيەتتى ارافات تاۋىنىڭ ماڭىندا قۇلشىلىعىن اتقارۋى ءتيىس ەدى.

«قازىر ءبارى جاقسى، تىنىش. كورىپ تۇرعاندارىڭىزداي، اۋا رايى اشىق، جىلى ءارى كۇن شىعىپ تۇر. جەل جوق»، - دەيدى قازاقستان مۇسىلماندارى ءدىني باسقارماسىنىڭ باسپا ءسوز حاتشىسى اعابەك قونارباي ۇلى.