مۇسىلمانداردىڭ قاسيەتتى مەرەكەسى - قۇربان ايت باستالدى
قۇربان ايتتىڭ مەملەكەتتىك دەڭگەيدە اتالىپ وتە باستاعانىنا دا، مىنەكەي، ون جىلدان استام ۋاقىت بولدى. دەربەس قازاقستاننىڭ تاريحىنا كوز جۇگىرتەر بولساق، 2005-جىلدىڭ 28- جەلتوقسانىندا ءماجىلىستىڭ جالپى وتىرىسىندا دەپۋتاتتار ءتيىستى زاڭ جوباسىن قابىلداپ، سوعان سايكەس قۇربان ايت پەن روجدەستۆو مەرەكەسىنىڭ ءبىرىنشى كۇنى ەلىمىزدە دەمالىس كۇندەرى بولىپ جاريالانعان بولاتىن. بيىل ۇلىق مەرەكەگە بايلانىستى قازاقستاندىقتار ءبىر كۇن - 21- تامىزدا، ياعني بۇگىن دەمالاتىن بولادى.
قۇربان ايت - الەمدەگى مۇسىلمان قاۋىمنىڭ ەڭ قاسيەتتى مەرەكەسى. قۇربان ءسوزى - اراب تىلىندە «جاقىنداۋ» دەگەندى بىلدىرەدى. ياعني، جاساعان ساۋاپ ىستەر ارقىلى جۇرەكتى تازارتىپ، اللاعا جاقىنداي ءتۇسۋ، ال شاريعاتتاعى تەرميندىك ماعىناسى - «شارتتارىمەن ساناسا وتىرىپ قۇلشىلىق نيەتىمەن مال باۋىزداۋ» دەگەنگە سايادى. قۇربان ايت كۇندەرى (العاشقى ءۇش كۇنى) شالىناتىن مال «ۇدھيا» دەپ اتالادى.
قۇرباندىققا قوي، ەشكى، سيىر، تۇيە سەكىلدى مالدار جارامدى. ال، ۇيرەك، قاز، تاۋىق، كۇركەتاۋىق، ەلىك سەكىلدى ت. ب. اڭ- قۇستار قۇرباندىققا جارامايدى. قۇرباندىققا جارايتىن قوي مەن ەشكى ەڭ كەمى ءبىر جاسار بولۋى قاجەت. دەگەنمەن التى ايلىق قوزى ءبىر جاسار قوي سەكىلدى ءىرى، قوڭدى بولسا، قۇرباندىققا جاراپ تۇر. ال ەشكى مىندەتتى تۇردە ءبىر جاسقا تولعان بولۋى قاجەت. سيىر ەكى جاسقا، تۇيە بەس جاسقا تولعاندا عانا قۇرباندىققا شالۋعا بولادى. قۇرباندىق مالدىڭ دەنى ساۋ، ەتتى جانە دەنە مۇشەلەرى تۇگەل بولۋى كەرەك. ونىڭ بويىندا قۇرباندىق رەتىندە شالۋعا كەدەرگى كەلتىرەتىن كەمشىلىكتەر بولماۋى قاجەت. قۇرباندىق مال عيبادات رەتىندە باۋىزدالۋى شارت.
ايت كەزىندە قۇرباندىق شالۋعا نيەتتەنگەن جاماعاتتىڭ بارلىعىن دا مال باعاسى قىزىقتىراتىندىعى ءسوزسىز. وسىنى ەسكەرە وتىرىپ، بۇعان دەيىن وقىرمان قاۋىمعا قازاقستاننىڭ ءوڭىر-وڭىرىندەگى قۇرباندىققا شالىناتىن مال باعاسىنا شولۋدى ۇسىنعان بولاتىنبىز.
قۇربان ايت مەيرامىن اتاپ ءوتۋ وزگە وڭىرلەرمەن بىرگە، بۇگىن ەلوردانىڭ بارلىق 9 مەشىتىندە مەرەكەلىك «ايت نامازىنان» (باستالۋى ساعات 07:00) باستاۋ الادى. 23- تامىزعا دەيىن ەلوردادا قۇرباندىق شالۋ ۇيىمداستىرىلادى. قازىرگى تاڭدا استانا قالاسىندا نەگىزگى قۇرباندىق شالۋ ورىندارى بەكىتىلگەن. ناقتىراق ايتقاندا، الماتى اۋدانى: «مەترو» س ءۇ (استانا- قاراعاندى ت/ج) ، بايقوڭىر اۋدانى: «نۇربەرەكە-555» ج ش س، الاش شوسسەسى، 30 («كوك بازار» بازارىنىڭ ارتى)، «ەسجانوۆا ا» جك، «جايلاۋ»، الاش شوسسەسى، ت س 313 كوشەسى، «شاۋشەن» شق، «استانا- پاۆلودار» ت/ج، 9 ك م، «تەمەش» ش ق، استانا -سوفيەۆكا ت/ج 7 شاقىرىم. ال ەسىل اۋدانىندا «التىن- تاعا» بازارى، قوسشى كەنتىنىڭ ماڭى، سارىارقا اۋدانىندا «ۇلجان» امبەباپ بازارى (بۇرىنعى «سايانۇر» بازارى) بەكىتىلگەن.
«قۇربان ايت» مەرەكەسىن اتاپ ءوتۋ كۇندەرى حالىققا قۇرباندىق شالۋ جانە تاعى باسقا وزەكتى ماسەلەلەر بويىنشا اقپاراتتاندىرۋ ءۇشىن تاۋلىك بويى «2288» Call-center جۇمىس جۇرگىزەتىن بولادى.