استاناداعى باقىلاۋ كامەرالارى تۇسىرگەن ۆيدەولار قانشا ۋاقىت ساقتالادى

 استانا. قازاقپارات - iKomek قالالىق مونيتورينگ جانە جەدەل ارەكەت ەتۋ ورتالىعىنىڭ باسشىسى جاننات ءدۇبىروۆا استاناداعى باقىلاۋ كامەرالارى تۇسىرگەن ۆيدەولار قانشا ۋاقىت ساقتالاتىنىن ايتتى، دەپ حابارلايدى قازاقپارات ءتىلشىسى.

«ۆيدەوارحيۆ 30 كۇن بويى ساقتالادى. وكىنىشكە قاراي، ودان ارتىق ساقتاي المايمىز، ويتكەنى ۆيدەولاردىڭ كولەمى تىم ۇلكەن. تۇنىقتىعى وتە اۋىر بولعاندىقتان، ولاردى ساقتاۋعا كوپ شىعىن جۇمسالادى» ، - دەيدى جاننات ءدۇبىروۆا.

باسشىنىڭ ايتۋىنشا، ورتالىقتا 160 ادام جۇمىس ىستەيدى.

«160 ادامنىڭ 60 ى وپەراتورلار، ولار اۋىسىممەن جۇمىس ىستەيدى. تۇندە 8, كۇندىز 22 ادام جۇمىس ىستەيدى. ۆيدەوباقىلاۋ بولىمىندە 60 ادام بار، ولار 20 ادامنان ءۇش اۋىسىمعا بولىنگەن» ، - دەيدى ج. ءدۇبىروۆا.

ونىڭ سوزىنە قاراعاندا، بۇگىنگى تاڭدا ورتالىققا الماتى اۋدانىنىڭ تۇرعىندارى وزگەلەردەن كوبىرەك جۇگىنەدى. ونىڭ ارتىنان سارىارقا، ەسىل اۋداندارى كەلەدى، ال كەنجە اۋدان بايقوڭىر تۇرعىندارى باسقالاردان ازداۋ جۇگىنەتىن كورىنەدى.