15:30, 20 - تامىز 2018 | GMT +6
شۇمەنوۆ پەن لەبەديەۆ ايقاسۋ ءوتۋى مۇمكىن
استانا. قازاقپارات - ءبىر جىلدان بەرى رينگكە شىقپاعان اۋىر سالماقتاعى رەسەيلىك دەنيس لەبەديەۆ رەسەيدىڭ بۇقارالىق اقپارات قۇرالدارىنىڭ بىرىنە بەرگەن سۇحباتىندا بەيبىت شۇمەنوۆتى الداعى جەكپە- جەكتەردەگى ىقتيمال قارسىلاستارىنىڭ ءبىرى دەپ اتادى، دەپ حابارلايدى Sports.kz.
قازاقستاندىق جانە رەسەيلىك بوكسشىنىڭ رينگتەگى الداعى ءوتۋى مۇمكىن كەزدەسۋىنە قاتىستى بوكستان قازاقستان جاسوسپىرىمدەر قۇراماسىنىڭ اعا باپكەرى عالىم كەنجەبايەۆ پىكىر ءبىلدىردى. بۇعان دەيىن ول گەننادي گولوۆكيندى اۋەسقوي بوكستا جاتتىقتىرعان بولاتىن.
«ەكى بوكسشىنىڭ دا جاسى ۇلعايعان. شىنىمدى ايتار بولسام، لەبەديەۆتى كورمەگەنىمە كوپ بولدى. ەكەۋىنىڭ جۇدىرىقتاسۋ تاسىلدەرى ءارتۇرلى، سوندىقتان ايقاس قىزىقتى ءوتۋى مۇمكىن» ، - دەدى مامان.