باس مۇفتي: مەيىرىمنىڭ مەرەكەسى - قۇربان ايت قۇتتى بولعاي
«مەيىرىمنىڭ مەرەكەسى - قۇربان ايت قۇتتى بولعاي!
«اسا قامقور، ەرەكشە مەيىرىمدى اللانىڭ اتىمەن باستايمىن!
قادىرمەندى قاۋىم!
بارشاڭىزدى ءيسى مۇسىلمان قاۋىمىنىڭ ۇلىق مەيرامى - قۇربان ايتپەن شىن جۇرەكتەن قۇتتىقتايمىن. ايت مەيرامى قۇتتى- بەرەكەلى بولعاي! ءار وتباسىنا اماندىق، مىقتى ساۋلىق، مول ىرىس پەن باق-بەرەكە تىلەيمىن!
قۇربان ايت - كۇللى مۇسىلمان ۇمبەتىنىڭ ەكى ۇلىق مەرەكەسىنىڭ ءبىرى. ءبىزدىڭ حالقىمىز بۇل مەيرامدى سان عاسىردان بەرى ەرەكشە قادىرلەپ، ايرىقشا اتاپ وتكەن. ايتۋلى مەيرامدا اعايىن- جۇرت ءبىر-بىرىنە «قۇربان ايت قۇتتى بولسىن، ايت قابىل بولسىن» ايتىپ، جىلى لەبىزدەرى مەن ىزگى تىلەكتەرىن ارناعان.
كورشى مەن تۋىسقانعا ايتتاپ بارۋ، ءقادىرلى قوناققا ايتتىق بەرىپ، ۇلكەننىڭ العىسى مەن باتاسىن الۋ - سوناۋ زاماننان جالعاسىپ كەلە جاتقان مۇسىلماندىق ءداستۇرىمىز.
اللاعا شۇكىر، سالتىنان جاڭىلماعان جۇرتىمىز تاۋەلسىزدىك جىلدارىندا ايتتى تويلاۋ ءداستۇرىن قايتا جاڭعىرتىپ، ونى حالىقتىق دەڭگەيدە اتاپ وتۋگە مۇمكىندىك الدى. ەلباسىنىڭ يگى باستاماسىمەن ەلىمىزدە قۇربان ايتتىڭ قۇرمەتىنە دەمالىس جاريالانىپ، بۇل مەيرام بارشا ۇلت پەن ۇلىستى بىرلىك پەن ىزگىلىككە ۇندەيتىن حالىقتىق مەرەكەگە اينالدى.
اسىلىندە «قۇربان» ءسوزى «جاقىن بولۋ»، «جاقىنداۋ» دەگەن ۇعىمداردى بىلدىرەدى. مۇسىلمان بالاسى ايت كۇنى قۇرباندىق شالۋ ارقىلى اللاعا دەگەن اق نيەتىن پاش ەتەدى. ويتكەنى، قاسيەتتى قۇراندا حاق تاعالا: «ۇمىتپاڭدار، ولاردىڭ ەتى دە، قانى دا ەشقاشان اللاعا جەتپەيدى. وعان جەتەتىن نارسە - جۇرەكتەرىڭىزگە ۇيالاعان تاقۋالىقتارىڭ (شىنايى نيەتتەرىڭ)» («حاج» سۇرەسى، 37-ايات)، - دەپ ادال نيەتتىڭ ماڭىزدىلىعىن اتاپ وتكەن.
جاعدايى بار، ءارى جولاۋشى ەمەس مۇسىلمانعا قۇرباندىق شالۋ - ءۋاجىپ، مۇسىلماندىق مىندەت. ال مۇمكىندىگى جوق ادامعا اللا تاعالا مۇنداي مىندەت جۇكتەمەگەن. بۇل قاسيەتتى كۇندە مۇمكىندىگى جوق، تۇرمىسى تومەن وتباسىلارعا قول ۇشىن بەرىپ، ولارعا قۋانىش سىيلاۋ - ساۋاپتى ءىس.
قۇرباندىققا تۇيە، سيىر جانە قوي، ەشكى شالىنادى. ءبىر قوشقار نەمەسە قوي ءبىر كىسى اتىنان شالىنادى. ال قارا مال نەمەسە تۇيەنى جەتى كىسى بىرىگىپ، قۇرباندىققا شالۋعا بولادى. قۇرباندىق مالىن ايت نامازىنان كەيىن ايتتىڭ ءۇشىنشى كۇنى كەش باتقانعا دەيىن شالۋعا بولادى. قۇرباندىق ەتى اعايىن- تۋىسقا، كورشىگە، تۇرمىسى تومەن وتباسىلارىنا تاراتىلادى.
ايت كۇنى ەرتە تۇرىپ، عۇسىل قۇيىنىپ، ايت نامازىنا قاتىسۋ - مۇسىلماندىق مىندەت. ايت نامازىنا ادەمى، تازا كيىممەن بارعان ابزال.
قۇرمەتتى وتانداستار!
قۇربان ايت - كەشىرىم مەن مەيىرىمنىڭ، قاناعات پەن قايىرىمدىلىقتىڭ مەرەكەسى. ايتتىڭ قۇرمەتىنە ىزگىلىك پەن كەڭشىلىكتىڭ جولىن ۇستانىپ، قاراۋسىز قالعان قارتتارعا قايىرىمدىلىق جاساپ، قامكوڭىل جاندارعا سىيلىق بەرۋدىڭ ساۋابى مول. وسى رەتتە بارشا وتانداستارىمدى ەل يگىلىگى ءۇشىن جاسالاتىن قايىرىمدىلىق اكسيالارى مەن ساۋاپتى ءىس-شارالارعا اتسالىسۋعا شاقىرامىن.
اللا تاعالا شالعان قۇرباندىقتارىڭىز بەن يگى امالدارىڭىزدى قابىل ەتكەي. قاسيەتتى مەككە قالاسىندا حالقىمىزدىڭ بىرلىگى مەن بەرەكەسىن سۇراپ، دۇعا جاساپ جاتقان وتانداستارىمىزدىڭ تىلەگى مەن قاجىلىعى قابىل بولعاي! ءامين!»، - دەلىنگەن قۇتتىقتاۋدا.