ازيا ويىندارىنا وزگە ەلدىڭ اتىنان قاتىسىپ جاتقان قانداستارىمىز كىمدەر؟
سارى قۇرلىقتىڭ باستى دوداسىنا قازاقستان قۇراماسى ساپىندا 440 سپورتشى اتتاندى. ونىڭ ىشىندە 404 سپورتشى 25 وليمپيادالىق سپورت تۇرىنەن باق سىنايدى.
ازيا ويىندارىنا وزگە ەلدىڭ اتىنان قاتىسىپ جاتقان قانى قازاق قانداستارىمىز دا بار. اتاپ ايتار بولساق، كەشە بوز كىلەمگە شىققان بالۋاندار اراسىندا 65 كەلىگە دەيىنگى سالماقتا قىتايدان كەلگەن قازاق بالۋانى ەرلانبەك كاتەي ۇلىن كوزىمىز شالدى. ءبىر قىزىعى، اسپان استى ەلىنەن كەلگەن قانداسىمىز شيرەك فينالدا ساياتبەك وقاسوۆپەن جولى ءتۇيىستى. قوس قازاق بالۋاننىڭ تەكەتىرەسىندە ساياتبەك 9:5 ەسەبىمەن جەڭىسكە جەتىپ، جارتىلاي فينالعا شىقتى.
ەرلانبەك كاتەي ۇلى مەن ساياتبەك وقاسوۆ
ەركىن كۇرەستەن ەرلانبەك كاتەي ۇلى 4 جىل بۇرىن وڭتۇستىك كورەيانىڭ ينچحون قالاسىندا وتكەن ازيا ويىندارىندا قولا مەدال يەلەنگەن بولاتىن. سونداي-اق قىتاي قۇراماسىنىڭ قاتارىندا 2016-جىلى ريو-دە-جانەيرو وليمپياداسىنا قاتىستى.
قىتاي قۇراماسى ساپىندا تاعى ءبىر قازاق بالۋانى بار. ول - ءۋاليحان سەرىك ۇلى. گرەك-ريم كۇرەسىنەن 59 كەلىگە دەيىنگى سالماقتا بەلدەسەدى. اسپان استى ەلىنىڭ ىشكى بىرىنشىلىگىندە ەكى رەت قولا جۇلدەگە قول جەتكىزگەن.
توقتاربەك تاڭاتحان ۇلى دەگەن قانداسىمىز دا قىتاي ەلىنىڭ اتىنان ازيا ويىندارىنا كەلگەن. ماقساتى - 2020-جىلى توكيودا وتەتىن وليمپيادا ويىندارىندا توپ جارۋ ەكەن. 75 كەلىگە دەيىنگى سالماقتا جۇدىرىقتاسادى. شىڭجاڭ وڭىرىندە تۋىپ وسكەن. 1996-جىلى دۇنيەگە كەلگەن توقتاربەك ءوز سالماعىندا قىتايدىڭ ەڭ مىقتى بوكسشىسى سانالادى.
2013-جىلدان باستاپ ەل ءىشى-سىرتىنداعى ءىرى تۋرنيرلەرگە قاتىسىپ ءجۇر. بۇل سالماقتا قازاقستان قۇراماسى ساپىندا ازيا ويىندارىنا ءابىلحان امانقۇل اتتاندى. ول جارىستىڭ اشىلۋ سالتاناتىندا ەلىمىزدىڭ تۋىن كوتەرىپ شىقتى.
وزبەكستان قۇراماسىندا ەتنيكالىق قازاق بالۋانى ەلمۇرات تاسمۇراتوۆ قازاق جانكۇيەرلەرىنە جاقسى تانىس. گرەك-ريم كۇرەسىنەن ازيانىڭ 4 دۇركىن جەڭىمپازى.
ەلمۇرات وزبەكستاننىڭ بوستاندىق اۋدانىندا دۇنيەگە كەلگەن. كىشكەنتايىنان كۇرەسپەن شۇعىلدانعان ۇلىن اتا-اناسى و ق و- داعى بەكزات ساتتارحانوۆ اتىنداعى سپورت ينتەرناتىندا وقىتقان. قازاقستان قۇراماسىنا ىلىكپەگەننەن كەيىن وزبەكستانعا قايتا ورالعان. 2016-جىلى ريودا وتكەن وليمپيادا ويىندارىنىڭ قولا جۇلدەگەرى، الەم چەمپيوناتىندا دا ەكى مارتە قولا جۇلدە يەلەنگەن.
بۇلبۇل مۇرات 4-نومىردە
موڭعوليا قىزدار باسكەتبول قۇراماسىندا بۇلبۇل مۇرات ەسىمدى قازاق ارۋى بار. ول گونكونگقا قارسى العاشقى ويىندا ءبىر ءوزى كومانداسىنا 37 ۇپاي سىيلادى.
ايتا كەتەيىك، XVIII جازعى ازيا ويىندارى 2- قىركۇيەككە دەيىن جالعاسادى.
vesti.kz