عالىمدار قارا ءتۇستى ساركوفاگتان تابىلعان ادامنىڭ كىم ەكەنىن انىقتادى
عالىمدار ەكى اپتا وتكەن سوڭ 30 توننالىق ساركوفاگتى اشىپ، ىشىنەن ادامنىڭ ءۇش قاڭقاسىن تاپقان. مىسىرداعى كونە زاتتار ىسىمەن اينالىساتىن جوعارعى كەڭەستىڭ باس حاتشىسى موستافا ۆازيري تابىلعان مۋميالاردىڭ ەشقانداي دا پاتشا نەمەسە اقسۇيەك ريمدىكتەرگە تيەسىلى ەمەس ەكەنىن مالىمدەگەن.
الدىن الا زەرتتەۋگە قاراعاندا، ساركوفاگتا كومىلگەندەر اسكەريلەر بولۋى مۇمكىن. ءبىراق ۆەستي. رۋ مالىمەتىنشە، العاشقى زەرتحانالىق زەرتتەۋلەر ءۇشىنشى مۋميانىڭ ايەل ادامعا تيەسىلى ەكەنىن كورسەتكەن. بۇل زەرتتەۋدى بيوارحەولوگ زەيناب حاشيش جۇرگىزىپ جاتىر ەكەن.
عالىمدار مەن مامانداردىڭ سوزىنە قاراعاندا، ءبىرىنشى قاڭقا 20-25 جاستاعى جانە بويى 160-164 سانتيمەتر بولاتىن قىز بالاعا تيەسىلى، ەكىنشىسى بويى 160-165 سانتيمەتر بولاتىن 35-39 جاستاعى ەر ادامعا تيەسىلى. ال ءۇشىنشى قاڭقانى زەرتتەۋ ناتيجەسى وندا ەر ادامنىڭ كومىلگەنىن انىقتادى.
بويى ۇزىن - 179-184,5 سانتيمەتر، شامامەن 40-44 جاسىندا قايتىس بولعان ەر ادام. ونىڭ قانقاسىنان ديامەترى 17 ميلليمەتر بولاتىن جىرىق انىقتالعان. «وعان حيرۋرگيالىق وتا جاسالعان بولۋى مۇمكىن»، - دەپ بولجادى بيوارحەولوگ.
ەندى عالىمدار مەن ماماندار كومپيۋتەرلىك توموگرافيا جاساپ، گەنەتيكالىق جانە يزوتوپتىق تالداۋ جاساپ، ونداعى ادامداردىڭ ولىم سەبەبىن انىقتاماق. سونداي-اق، ساركوفاگتى اشۋ كەزىندە سۇيىقتىقتىڭ قايدان پايدا بولعانى زەرتتەلەتىنى ايتىلادى.
Kaz.tengrinews.kz