الماتىدا ستۋدەنتتەر اراسىندا فۋتزالدان الەم چەمپيوناتى اشىلدى
تۋرنيردىڭ اشىلۋ سالتاناتىنا ءبىلىم جانە عىلىم ءمينيسترى ەرلان ساعاديەۆ، FISU ۆيتسە- پرەزيدەنتى ماريان دىمالسكي، الماتى قالاسىنىڭ باسشىلىعى، بەلگىلى سپورتشىلار، مادەنيەت قايراتكەرلەرى، ج و و رەكتورلارى قاتىستى.
الماتى اكىمى باۋىرجان بايبەك چەمپيوناتتى سالتاناتتى تۇردە اشىق دەپ جاريالادى. تورەشى تالعات دوسمۇحامەدوۆ پەن قازاقستان ەرلەر قۇراماسىنىڭ كاپيتانى ءبىرجان ورازوۆ سپورتشىلار اتىنان ءادىل كۇرەس تۋرالى انت بەردى. حاتۋ رەكتورى، ۇلتتىق ستۋدەنتتەر ليگاسىنىڭ پرەزيدەنتى دامير شىنىبەكوۆتىڭ ايتۋىنشا، 16 جىلدان بەرى ستۋدەنتتەر الەم چەمپيوناتىنا قاتىسۋشىلاردىڭ سانى رەكوردتىق مەجەگە جەتكەن: بيىل تۋرنيرگە 17 ەلدەن 25 كوماندا، 454 ستۋدەنت قاتىسىپ وتىر.
FISU ۆيتسە- پرەزيدەنتى ماريان دىمالسكي الماتى سپورت جارىستارىن ۇنەمى جوعارى دەڭگەيدە ۇيىمداستىراتىنىن ايتىپ، وسى تۋرنير دە تاماشا وتەتىنىنە سەنىم ءبىلدىردى. اشىلۋ سالتاناتىنا قازاق ەستراداسىنىڭ جۇلدىزدارى قاتىسىپ جاتىر. شارانىڭ باسىندا 2014 -جىلعى وليمپيادانىڭ قول جۇلدەگەرى، مانەرلەپ سىرعاناۋشى دەنيس تەنگە ارنالعان قويىلىم كورسەتىلدى.
