ولكە تانۋ ءپانىن وقىتۋ جاستاردى پاتريوتيزمگە تاربيەلەيدى

كوكشەتاۋ. قازاقپارات - ەلىمىزدەگى مەكتەپتەردە ولكەتانۋ ءپانىن وقىتۋ جاستاردى پاتريوتيزمگە تاربيەلەيدى. بۇل تۋرالى اقمولا وبلىسىنىڭ «زەرەن» ساۋىقتىرۋ ورتالىعىنىڭ بازاسىندا «زەرەن» رەسپۋبليكالىق جاستار ءبىلىم بەرۋ لاگەرىنىڭ «جاڭعىرۋ ترەندتەرى» ەكىنشى اۋىسىمىنىڭ رەسمي اشىلۋىنا قاتىسقان ق ر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالايەۆا ايتتى،

 دەپ حابارلايدى قازاقپارات ءتىلشىسى.

 «تۋعان جەر» جوباسى شەڭبەرىندە قازاقستاندىقتار تۋعان ولكەسى تۋرالى بارلىق ماعلۇماتتى مەكتەپ پارتاسىنان وقىپ وسەتىن بولدى. بۇل باعىتتا ءالى تالاي ەسكەرتۋلەر بولادى. ولار الداعى ۋاقىتتا ەسكەرىلەدى. دەگەنمەن، بيىلعى وقۋ جىلىنان باستاپ ەلىمىزدىڭ بارلىق مەكتەپتەرىندە ولكەتانۋ ءپانى وقىتىلا باستايدى. بارلىق وڭىرلەر ولكەتانۋ وقۋلىعىن ازىرلەدى. جاڭا وقۋلىق وقۋشىلارعا شىققان تەگىن، تۋعان ولكەنىڭ تاريحى مەن داستۇرلەرىن ءبىلىپ، زەرتتەۋگە جانە بۇگىنى مەن كەلەشەگى تۋرالى وي تۇيىندەۋگە مۇمكىندىك بەرەدى.

 وعان قوسا، ق ر ءبىلىم جانە عىلىم مينيسترلىگى تاراپىنان حرەستوماتيا وقۋلىعى ازىرلەنىپ جاتىر. بۇل كىتاپتا بارلىق وڭىرلەردىڭ تاريحي ءبىر كىتاپقا بىرىكتىرىلەدى. وسىلايشا، جاستاردىڭ ءوزىنىڭ تۋعان جەرىنە دەگەن ماحابباتى ارقىلى قازاقستاندىق پاتريوتيزم قالىپتاسپاق»، دەيدى ايدا بالايەۆا.

سونىمەن قاتار، ول ەلىمىزدە «100 جاڭا وقۋلىق» جوباسىنىڭ دا ءساتتى جۇزەگە اسىرىلىپ جاتقانىن اتاپ ءوتتى. بۇل كىتاپتىڭ العاشقىلارى الداعى وقۋ جىلىندا ەلىمىزدەگى جوعارى وقۋ ورىندارىندا وقىتىلا باستايدى.

 ەسكە سالا كەتەيىك، جاقىندا اقمولا وبلىسىنىڭ «زەرەن» ساۋىقتىرۋ ورتالىعىنىڭ بازاسىندا «زەرەن» رەسپۋبليكالىق جاستار ءبىلىم لاگەرىنىڭ « Digital-ۇرپاق» اتتى ءبىرىنشى اۋىسىمى رەسمي تۇردە اشىلعان بولاتىن. وعان ەلىمىزدىڭ ءار وڭىرىنەن كەلگەن جاستار ۇيىمدارىنىڭ كوشباسشىلارى، جاس كاسىپكەرلەر، «قازاقستاننىڭ 100 جاڭا ەسىمى» جوباسىنىڭ قاتىسۋشىلارىنان قۇرالعان جاستار قاتىسۋدا. لاگەر 12-26 - تامىز ارالىعىندا 3 تاقىرىپتىق اۋىسىمدا وتكىزىلەدى. كەشە لاگەردىڭ «جاڭعىرۋ ترەندتەرى» اتتى ەكىنشى اۋىسىمى اشىلدى.

اۆتور: اسلان وسپانوۆ