مەكتەپتەرگە اكادەميالىق دەربەستىك بەرىلدى – ب ع م

استانا. قازاقپارات - بيىلدان باستاپ مەكتەپتەردىڭ پەداگوگيكالىق كەڭەستەرى ءبىراز ماسەلەلەردى وزدەرى شەشە الادى. ءبىر تيپتىك وقۋ جوسپارى بولمايدى. ءاربىر مەكتەپ وزىنە ىڭعايلى جوسپاردى قولدانسا بولادى، دەپ حابارلايدى قازاقپارات ءتىلشىسى.

ق ر ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا، ءاربىر مەكتەپتىڭ دەربەس شەشىم قابىلداۋ قۇزىرەتى - جاڭا وقۋ جىلىنىڭ تاعى ءبىر ماڭىزدى جاڭالىعى. وسىعان بايلانىستى ءتيىستى نورماتيۆتىك قۇجاتتارعا وزگەرىس ەنگىزىلىپ، پەداگوگيكالىق كەڭەستىڭ شەشىم قابىلداۋ قۇزىرەتى كەڭەيتىلدى.

«ەندىگى جەردە بەس كۇندىك وقۋدى جالعاستىرۋ، تيپتىك وقۋ جوسپارىن تاڭداۋ، پاندەردى اعىلشىن تىلىندە جۇرگىزۋگە كوشۋ، ەكستەرناتقا رۇقسات بەرۋ، كەيبىر پاندەردى ءبولىپ، نە بولمەي وقىتۋ، ءبىلىم ساپاسىن باقىلاۋ جانە تاعى دا باسقا سۇراقتاردى پەداگوگيكالىق كەڭەس ءوزى شەشەدى»، - دەدى ە. ساعاديەۆ تامىز كونفەرەنسياسىنىڭ پلەنارلىق ماجىلىسىندە.

 ءمينيستردىڭ سوزىنە قاراعاندا، ەندى ءبىر تيپتىك وقۋ جوسپارى بولمايدى. بۇگىندە بىرنەشە جوسپار ازىرلەندى. «مەكتەپ وزىنە كەلەتىن جوسپار بويىنشا جۇمىس جاساي الادى. وسىلايشا، بارلىق مەكتەپتەرگە وسى تيپتىك وقۋ جوسپارلارى ارقىلى اكادەميالىق دەربەستىك بەرۋدى دۇرىس دەپ ەسەپتەيمىز. جالپى، مەكتەپ جوسپارلارىمەن قاتار گيمنازيا، ليتسەيلەر، دارىندى بالالارعا ارنالعان مەكتەپتەر، كەشكى مەكتەپتەر ءۇشىن وقۋ جوسپارلارى دايىندالعاندا مۇعالىمدەردىڭ ۇسىنىستارى ەسكەرىلدى»، - دەپ اتاپ كورسەتتى ە. ساعاديەۆ.

 ايتا كەتەيىك، بيىل مينيسترلىك مۇعالىمدەردىڭ جۇكتەمەسىنە قاتىستى بۇيرىقتى شىعاردى. وعان سايكەس، مەكتەپ مۇعالىمى تەك 5 قۇجاتتى عانا تولتىرۋعا مىندەتتى. ودان ارتىق سالماق سالىنسا، مەكتەپ باسشىلىعىنىڭ ۇستىنەن ارىز تۇسىرۋگە بولادى.

اۆتور: ارمان اسقاروۆ