كوللەدج وقىتۋشىلارىنا ۇستەماقى تولەنەدى - ەرلان ساعاديەۆ

استانا. قازاقپارات - كوللەدج وقىتۋشىلارى مەكتەپ مۇعالىمدەرى سياقتى اتتەستاتسيادان وتەتىن بولادى. سونىڭ ناتيجەسى بويىنشا ۇستەماقى تولەنەدى، دەپ حابارلايدى قازاقپارات ءتىلشىسى.

 ق ر ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا، 2020 -جىلعا قاراي ۇلتتىق بىلىكتىلىك تەستى ازىرلەنەدى. بۇگىندە ونداي جۇيە ورتا ءبىلىم سالاسىندا مەكتەپ مۇعالىمدەرى تاپسىرىپ وتىرادى. سونىڭ ناتيجەسى بويىنشا ۇستەماقى الادى.

«2019 -جىلى ءبىز تەست تاپسىرلامالارى مەن ۇستەماقى تولەۋ جۇيەسىن ازىرلەيمىز. ءسويتىپ، كاسىپتىك- تەحنيكالىق ءبىلىم سالاسىنىڭ وقىتۋشىلارى دا بىلىكتىلىك ساناتىنا قاراي جالاقى الادى»، - دەدى ە. ساعاديەۆ تامىز كونفەرەنسياسىنىڭ پلەنارلىق ماجىلىسىندە.

 ايتا كەتەيىك، كەلەسى جىلدان باستاپ كوللەدجدەردىڭ رەيتينگىسى جاسالادى. سوعان قاراي ءاربىر كوللەدجدىڭ وقۋ باعدارلاماسى دا، مەملەكەتتىك تاپسىرىستىڭ كولەمى دە وزگەرەتىن بولادى. اتالعان رەيتينگ كوللەدج تۇلەكتەرىنىڭ جۇمىسقا تۇرۋ كورسەتكىشىنە نەگىزدەلەدى. ەگەر بەلگىلى ءبىر كوللەدجدىڭ كورسەتكىشى تومەن بولسا، وندا ول باعىتتا مامان دايارلاۋ توقتاتىلادى.

«قازىردىڭ وزىندە كاسىبي- تەحنيكالىق ءبىلىم سالاسىندا ءبىر- ءبىر قايتالايتىن جانە ەشبىر سۇرانىسى جوق 109 ماماندىق قىسقارتىلدى. سونىڭ ناتيجەسىندە 66 كوللەدجدىڭ سالالىق باعىتى وزگەردى. ال 20 وقۋ ورنى ءبىر- بىرىنە قوسىلدى. وسى سالاداعى جۇمىس جالعاسا بەرەدى. ءبىز جاس مامانداردىڭ جۇمىسقا تۇرۋ كورسەتكىشىنە باسا نازار اۋدارامىز. ماماندىققا دۇرىس ۇيرەتپەسە، تۇلەكتەر جۇمىسقا تۇرا الماسا، ول ماماندىقتىڭ ليسەنزياسىن كەرى قايتارامىز»، - دەپ اتاپ كورسەتتى ە. ساعاديەۆ.