حالىقارالىق ساراپشىلار الاكولدىڭ ماۋسىمدىق مەرزىمىن ۇزارتۋدى ۇسىندى

تالدىقورعان. قازاقپارات - بولاشاقتا الاكول كولىمەن جوڭعار الاتاۋ ۇلتتىق پاركى بىرىگىپ جۇمىس ىستەۋى مۇمكىن. وسىلايشا تۋريستەرگە دەمالۋ ماۋسىمىنىڭ ۋاقىتىن ۇزارتۋ كوزدەلىپ وتىر، دەپ حابارلايدى قازاقپارات ءتىلشىسى.

 مۇنداي ۇسىنىستى ا ق ش- تان كەلگەن حالىقارالىق كونسالتينگ ورتالىعىنىڭ ساراپشىلارى ۇسىندى. كومپانيا وكىلدەرى مادەنيەت جانە سپورت مينيسترلىگىنىڭ ارنايى تاپسىرماسى بويىنشا تۋريستىك ايماقتاردى دامىتۋدىڭ جوباسىن ازىرلەۋدە.

 «دەمەك، الاكول كولىنە كەلگەن تۋريستەر تەك شومىلىپ عانا قايتپايدى. ولارعا جەتىسۋدىڭ تاماشا تابيعاتىن، تاۋداعى دەمالىستى، فلورا مەن فاۋناسىن كورسەتۋ كوزدەلىپ وتىر. نەگىزىنەن الاكول كولىنىڭ شومىلۋ ۋاقىتى ماۋسىم ايىندا باستالىپ، تامىز ايىنىڭ سوڭىنا جەتپەي اياقتالىپ قالادى. بۇل ولقىلىقتى جويۋ ءۇشىن، وسى تۋريستىك ايماققا جابىق باسسەيندەردى سالۋ كوزدەلۋدە. ازىرگە بۇل ۇسىنىس عانا»، - دەدى الماتى وبلىستىق تۋريزم باسقارماسىنىڭ باسشىسى جانار الشىمبايەۆا.

باسقارما باسشىسىنىڭ سوزىنشە، نيۋ- يوركتەن كەلگەن «McKinsey» حالىقارالىق كونسالتينگ ورتالىعىنىڭ ساراپشىلارى الاكول كولىنىڭ تۋريستىك الەۋەتىمەن تانىسىپ، ءارى قاراي ايماقتى دامىتۋدىڭ ماستەر جوسپارىن ازىرلەيدى. الەمنىڭ 96 مەملەكەتىندە كەڭسەسى بار تانىمال كومپانيا مادەنيەت جانە سپورت مينيسترلىگىنىڭ ارنايى تاپسىرماسى بويىنشا جۇمىس اتقارىپ جاتىر ەكەن. ولار قازاقستاندا 10 باعىت بويىنشا دامىتۋ جوباسىن جاساماق، سول جوبالاردىڭ ىشىنە الاكول دە كىرگەن. «ساراپشىلار شىعىس قازاقستان وبلىسىنىڭ ايماعىنداعى الاكول كولىندە دە بولدى. ولار ۇسىنىستارىن جاساپ، تاپسىرىس بەرۋشىگە ماستەر پلاندى ۇسىناتىن بولادى، بۇل جوبانىڭ ىشىنە ناقتى الاكول كولىن دامىتۋ ءۇشىن نە جاساۋ كەرەك، قانداي باعىتقا كوڭىل ءبولۋ كەرەك، بارلىعى كورسەتىلەدى»، - دەدى ج. الشىمبايەۆا.

جالپى ساراپشىلار الماتى وبلىسىنداعى الاكول كولىندە ءبىر كۇن بولىپ، بۇگىن تالدىقورعاندا ارنايى اكىمدىك وكىلدەرىمەن جيىن وتكىزدى.