كونگولىقتار ءشامشىنىڭ ءانىن فرانسۋز تىلىندە شىرقادى

الماتى. قازاقپارات - ءشامشى قالداياقوۆتىڭ تۋعان كۇنىنە وراي، كوكتەمدە وتكەن كونسەرت ماتەريالدارى بويىنشا ازىرلەنگەن ديسكىنىڭ تانىستىرىلىمى ءوتتى. كونسەرت «رۋحاني جاڭعىرۋ» باعدارلاماسى اياسىندا رەسپۋبليكا سارايىندا ءوتتى،

  دەپ حابارلايدى قازاقپارات ءتىلشىسى.

ديسكىدەگى اندەردى تىڭداعان قوناقتار 70-جىلدارداعى الماتىعا ساپار شەككەندەي بولدى. ۇيىمداستىرۋشىلاردىڭ ايتۋىنشا، قالداياقوۆ كەزىندە قازاقستاندا The Beatles سياقتى تانىمال بولعان.

ديسكىلەر CinemArt قوعامدىق قورىنىڭ دەمەۋشىلىك ەتۋىمەن، ءشامشى قالداياقوۆتىڭ ۇلى، اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ديريجەرى مۇحتار قالداياقوۆتىڭ قولداۋىمەن شىعارىلدى.

«بۇل جوباعا كىرىسكەلى ءبىراز جىل بولدى. ونى ىسكە اسىرا العانىما وتە قۋانىشتىمىن. قالا اكىمدىگى، اكىمنىڭ ءوزى قولداۋ بىلدىرگەنى ءۇشىن ايتار العىسىم شەكسىز»، - دەيدى م. قالداياقوۆ.

راسۇل جارماعامبەتوۆ، بالۋان بەركەنوۆ، ازامات ماشىلوۆ، تولەگەن راحىمبايەۆ، باقتىگۇل بيسەمبايەۆا، ديانا شاراپوۆا سەكىلدى ونەر تارلاندارىمەن قاتار، قالداياقوۆتىڭ «مويىنقۇمدا» ءانىن قازاق جانە فرانسۋز تىلدەرىندە ورىنداعان كونگودان كەلگەن «دجامبو- دجامبو» توبى كورەرمەن قاۋىمدى ءتانتى ەتتى.

«قازاق ءتىلىنىڭ اۋەزدىلىگى فرانسۋز تىلىنە جاقىن. العاش وسى ءاندى ەستىگەنىمدە، ول مىندەتتى تۇردە رەپەرتۋارىمىزدا بولۋى قاجەت دەپ ويلادىم. ءبىزدىڭ كوماندا ورىسشا دا، قازاقشا دا سويلەمەيدى، ءبىراق كونسەرتتەرىمىزدە كوپتەگەن قازاق اندەرىن ايتامىز»، - دەيدى  «Jambo Jambo»پروديۋسەرى ابيدي.

اسا تالانتتى قازاق كومپوزيتورى ءشامشى قالداياقوۆ اندەرىن ديسكىگە جازۋ CinemArt قورىنىڭ العاشقى جوبالارىنىڭ ءبىرى بولدى. قور الداعى ۋاقىتتا قازاقستانداعى دارىن يەلەرى مەن ونەر ۇجىمدارىن قولداۋ جوبالارىن دامىتپاق.