شەتەلدىك ماماندار اۆتوجولداردى ۇزاق قولدانۋدىڭ سىرىمەن ءبولىستى

استانا. قازاقپارات - الماتىدا سەمەنت- بەتوندى جولداردى جوندەۋ مەن ولاردى كۇتىپ ۇستاۋدىڭ جاڭا تەحنولوگيالارىنا ارنالعان عىلىمي- تاجىريبەلىك كونفەرەنسيا ءوتتى.

 گەرمانيا، فرانسيا جانە ا ق ش- تان كەلگەن بىلىكتى ماماندار قازاقستاندىق ارىپتەستەرىمەن ءوز تاجىريبەلەرىمەن ءبولىستى. شەتەلدىك عالىمداردىڭ ايتۋىنشا، جولدى ساپالى سالىپ، كەيىن جاقسى كۇتىم جاساسا، ەكونوميكاعا بەرەر پايداسى مول.

 مىسالى، وسىدان 80 جىل بۇرىن گەرمانيادا سالىنعان الەمدەگى العاشقى سەمەنت- بەتوندى اۆتوبان ءالى كۇنگە دەيىن ەل يگىلىگىنە جاراپ تۇر. قازاقستاندا استانا- شۋچيسنك، باتىس ەۋروپا- باتىس قىتاي ترانزيتتىك دالىزىنە تولىعىمەن، ال الماتى- وسكەمەن اۆتوجولىنىڭ ءبىر بولىگىنە سەمەنت- بەتوندى جامىلعى توسەلگەن.

 مۋزافار حوليكوۆ، كونفەرەنسيانى ۇيىمداستىرۋ كوميتەتىنىڭ مۇشەسى:

- سوڭعى بەس جىلدا قازاقستاندا سەمەنت- بەتوندى جولدار كوپتەپ سالىندى. جول سالۋدى ۇيرەندىك. ال ولارعا لايىقتى كۇتىم جاساۋدى ءالى تولىق مەڭگەرگەن جوقپىز. سوندىقتان تاجىريبە الماسۋ ءۇشىن شەتەلدەن وسى سالانىڭ بىلگىرلەرىن شاقىرىپ وتىرمىز.

بەرند ياننيكە، عىلىم دوكتورى /گەرمانيا/:

- سەمەنت- بەتوندى جولدى ۇزاق قولدانامىز دەسەڭىزدەر، جارىقشاقتارعا مۇقيات كوڭىل ءبولۋ قاجەت. مىسالى، جولعا كىشكەنتاي عانا سىزات تۇسسە، ونى تەز ارادا اسفالتتى جامىلعىمەن بەكىتۋ كەرەك. ويتكەنى جارىقشاققا كىرگەن سۋ مۇز بولىپ قاتىپ بەتوندى بۇلدىرەدى.

www.24.kz