مەكتەپ پەن اتا- انالار اراسىندا كەلىسىمشارتتار نە ءۇشىن راسىمدەلەدى

استانا. قازاقپارات - اتالعان باستاما العاش رەت بيىلعى وقۋ جىلىنان باستاپ ەنگىزىلەدى، دەپ حابارلايدى قازاقپارات ءتىلشىسى.

ق ر ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا، مەكتەپ پەن اتا- انالار اراسىندا ناقتى كەلىسىمشارت بولسا، اربىرەۋى ءوز مىندەتتەرىن بىلەتىن بولادى. وعان قوسا، مەكتەپ مۇعالىمدەرىنە ارتىق سالماق تۇسپەيدى.« ءبىز مەكتەپ پەن اتا- انا اراسىندا كەلىسىمشارت جاساۋدى العاش رەت ەنگىزدىك. اتالعان قۇجاتپەن مۇعالىمدەر مەن مەكتەپ ادمينيستراتسياسىنىڭ قۇقىعىن قورعاپ، مىندەتتەرىن رەتتەۋگە بولادى. سەبەبى بىزگە ەكى تاراپتىڭ ءوز مىندەتتەرىن جانە قۇقىعىن بىلەتىن جانە ورىندايتىن جۇيە قالىپتاستىرۋ وتە ماڭىزدى. وسىنىڭ بارلىعى - ءمۇعالىمنىڭ جۇمىسىن جەڭىلدەتۋگە باعىتتالعان شارالار»، - دەدى ە. ساعاديەۆ تامىز كونفەرەنتسياسىنىڭ پلەنارلىق ماجىلىسىندە.

ايتا كەتەيىك، بيىل مينيسترلىك مۇعالىمدەردىڭ جۇكتەمەسىنە قاتىستى ارنايى بۇيرىق تا شىعاردى. وعان سايكەس، مەكتەپ ءمۇعالىمى تەك 5 قۇجاتتى عانا تولتىرۋعا مىندەتتى. ودان ارتىق سالماق سالىنسا، مەكتەپ باسشىلىعىنىڭ ۇستىنەن ارىز تۇسىرۋگە بولادى. ق ر ءبىلىم جانە عىلىم ۆيتسە- ءمينيسترى اسحات ايماعامبەتوۆتىڭ ايتۋىنشا، اتالعان ماسەلە ءجيى كوتەرىلەدى. سەبەبى مۇعالىمدەر قاعازباستى جۇمىستان بوسامايدى. ولاردى كوپتەگەن قۇجاتتاردى تولتىرۋعا مىندەتتەيدى. «وسىعان بايلانىستى ءبىلىم جانە عىلىم مينيسترلىگى بيىل ارنايى بۇيرىق شىعاردى. وندا مەكتەپ ءمۇعالىمى تولتىراتىن قۇجاتتاردىڭ ناقتى ءتىزىمى كورسەتىلگەن. بەس قۇجات قانا، ول - جۋرنال، كۇندەلىك، بالالاردى سۋماتيۆتى- فورماتيۆتى باعالاۋ، كۇنتىزبەلىك جانە پاندىك جوسپار. بولدى. ءمۇعالىم تەك وسى قۇجاتتاردى عانا تولتىرۋعا مىندەتتى. باسقاسىنا ۋاقىت كەتىرۋگە مىندەتتى ەمەس»، - دەدى ا. ايماعامبەتوۆ.

ونىڭ ايتۋىنشا، مۇعالىمدەردىڭ جۇكتەمەسىن ودان ارتىق كوتەرۋگە بولمايدى. مەكتەپ باسشىلىعى ارتىق جۇمىس بەرسە، ارىز تۇسىرۋگە بولادى. «ءبىلىمدى باقىلاۋ دەپارتامەنتىنە حابارلاسۋعا بولادى. ونداي دەپارتامەنتتەر بارلىق وبلىستاردا بار. ارىز تۇسسە، ءتيىستى شارالار قولعا الىنادى»، - دەپ اتاپ كورسەتتى ا. ايماعامبەتوۆ.