قۇربان ايت مەيرامىنىڭ العاشقى كۇنىندە قاراعاندىدا قايىرىمدىلىق جارمەڭكەسى وتەدى

 قاراعاندى. قازاقپارات - 21-23 - تامىز ارالىعىندا ءيسى مۇسىلمان قاۋىمى قاسيەتتى قۇربان ايت مەرەكەسىن تويلايدى.

21 - تامىز ساعات 06.30 دا قاراعاندى وبلىسىنىڭ بارلىق مەشىتتەرىندە ايت نامازى وقىلادى. سودان كەيىن ساعات 07.00 دەن 14.00 گە دەيىن وبلىستىق ورتالىق مەشىت جانىندا قايىرىمدىلىق جارمەڭكەسى وتەدى، دەپ حابارلايدى ءوڭىر باسشىسىنىڭ رەسمي سايتى.

سونىمەن قاتار بۇل كۇنى وبلىستىق مەشىتتە بالالار ءۇيىنىڭ تاربيەلەنۋشىلەرىنە ارنالعان مەرەكەلىك شارا ۇيىمداستىرىلماق.

 - قۇربان ايت - يسلامداعى ەڭ باستى مەيرامداردىڭ ءبىرى. بۇل كۇندەرى مۇسىلمان قاۋىمى قۇرباندىق شالىپ، ونى تۋعاندارىنا، كورشىلەرىنە، مۇقتاج جاندارعا تاراتادى. از قامتىلعان وتباسىلارىنا كومەك كورسەتەدى. ءبىز بالالار ءۇيىنىڭ تاربيەلەنۋشىلەرىنە مەرەكە ۇيىمداستىرىپ، ولارعا سىيلىق تاراتۋدى ءجون سانادىق، - دەيدى قاراعاندى وبلىسىنىڭ باس يمامى ءومىرزاق بەكقوجا.