جوعارى وقۋ ورىندارىندا كەيبىر ماماندىقتار جابىلادى - مينيستر ساعاديەۆ

None
None
استانا. قازاقپارات - بيىل جوعارى وقۋ ورىندارىنا قوسىمشا 20 مىڭ گرانت بەرىلدى. وسىعان بايلانىستى مينيسترلىك جوعارى ءبىلىمنىڭ ساپاسىن ءجىتى باقىلايتىن بولادى، دەپ حابارلايدى قازاقپارات ءتىلشىسى.

ق ر ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا، الداعى ۋاقىتتا جوعارى وقۋ ورنىن بىتىرگەن تۇلەكتەردىڭ جۇمىسقا تۇرۋ كورسەتكىشىنە باسا نازار اۋدارىلادى. اتالعان مەجە تومەن بولسا ، سول ماماندىقتىڭ ليسەنزياسى كەرى قايتارىلادى.

«مەملەكەت باسشىسى بۇرىن- سوڭدى بولماعان شارانى قولعا الدى. بىلتىر مەملەكەتتىك گرانتتاردىڭ سانى 10 مىڭعا ارتتى. بيىل تاعى 20 مىڭ گرانت ءبولىندى. دەمەك، ونىمەن بىرگە جوعارى وقۋ ورىندارىنىڭ جاۋاپكەرشىلىگى ارتادى. ءبىز ءبىلىم ساپاسىنا باسا نازار اۋدارامىز. ال بۇل ماسەلەنى قالاي قاداعالايمىز؟ بىرىنشىدەن، جاس مامانداردىڭ جۇمىسقا تۇرۋ رەيتينگىسى بويىنشا ءاربىر جوعارى وقۋ ورنىنىڭ جۇمىسىن باعالايمىز. ەگەر اتالعان كورسەتكىش تومەن بولسا، وندا سول ماماندىق بويىنشا ليتسەنزيانى كەرى قايتاراتىن بولامىز. بۇل - باستى كورسەتكىش. سەبەبى جۇمىس نارىعىندا ءاربىر تۇلەككە سۇرانىس بولۋى قاجەت»، - دەدى ە. ساعاديەۆ تامىز كونفەرەنسياسىنىڭ پلەنارلىق ماجىلىسىندە.

ءمينيستردىڭ ايتۋىنشا، بيىل رەسپۋبليكا بويىنشا 17 ماماندىقتىڭ ليسەنزياسى كەرى قايتارىلدى. وسى سالاداعى جۇمىس كۇشەيە بەرەدى.

«سونىڭ ناتيجەسىندە جوعارى وقۋ ورىندارى ناقتى ءبىر سالاعا ماماندانا باستايدى. ماسەلەن، ءبىر باعىتتا جاقسى مامان دايارلاسا، سول باعىتپەن كەتە بەرەدى. ال باسقا باعىتتارعا ۋاقىت شىعىنداۋدىڭ قاجەتى جوق. ەكىنشىدەن، جوعارى وقۋ ورىندارىنا قاتىستى كاسىبي تالاپتار كۇشەيەدى. ەندى، ۋنيۆەرسيتەت، اكادەميا مەن ينستيتۋت دارەجەسىن بەرۋ جۇمىسى قاتاڭ باقىلانادى. ۇشىنشىدەن، ءبىز جوعارى وقۋ ورىندارى ليگاسىنىڭ قۇرىلعانىن تولىعىمەن قولدايمىز. اتالعان ۇيىم جوعارى ءبىلىم ساپاسىن جوعارى دەڭگەيگە كوتەرەدى دەگەن سەنىم بار. بۇدان بولەك، رەكتورلاردىڭ تيىمدىلىگىن باعالاۋ جۇيەسى، انتيپلاگيات جانە تاعى باسقا تەتىكتەر بار. جوعارى ءبىلىمنىڭ ساپاسىن قاداعالاۋ كەزىندە ءبىز سونىڭ ءبارىن قولدانامىز»، - دەپ اتاپ كورسەتتى ە. ساعاديەۆ.

اۆتور: ارمان اسقاروۆ

سوڭعى جاڭالىقتار