ترانسفورمەر فيلمىنە تۇسكەن اكتەر شىعىس قازاقستاندا ءجۇر
كورشى ەلدىڭ تانىمال بولوگەرلەرىن قازاقستانعا «قازاق تۋريزم» ۇلتتىق كومپانياسى شاقىرعان ەكەن. 2 كۇن الماتى مەن شىمكەنتتى ارالاعان مەيماندار ءبىر اپتا بويى شىعىس قازاقستاننىڭ كاتونقاراعاي، گلۋبوكوە، زىريان اۋداندارىنىڭ ەڭ كورىكتى جەرلەرىن ارالادى. ءتورت بلوگەر شىعىسقا جاساعان ساياحاتتان العان اسەرلەرى تۋرالى ارنايى بريفينگتە ايتىپ بەردى.
قۇرامىندا «سينحۋا» اگەنتتىگىنىڭ تاۋەلسىز فوتوگرافى سە بينتسين، گاسترونوم- بلوگەر سۋن سياوپەن، ساياحاتشى بلوگەر جان جي تاو، جازۋشى ءارى بلوگەر ليۋ ۆەنۆەن بلوگەرلەر توبى بەرەل قورىمدارى، راحمان قاينارى، اقباۋىر تاۋى، بۇقتىرما سۋ قويماسى مەن التاي ءالپىسى سياقتى نىسانداردى ارالاپ، جەرگىلىكتى حالىقپەن سۇحباتتاسىپتى.
ىرگەمىزدە قىتايدىڭ ميلليارد ادامدىق نارىعى جاتىر. بۇل شىعىس قازاقستان سياقتى تۋريستىك الەۋەتى ۇلكەن ءوڭىر ءۇشىن جاقسى مۇمكىندىك. ازىرگە قىتايلىق تۋريستەردى ۆيزا ماسەلەسى تەجەپ وتىر. ايتپەسە ءبىزدىڭ اسەم تابيعاتقا قىزىعۋشىلىق جوعارى. بۇل كەلگەن بلوگەردىڭ ءارقايسىندا تەك Weibo جەلىسىندە عانا 2 ميلليون وقىرمانى بار. سوندىقتان ولاردى شاقىرۋ ارقىلى ءبىز قىتاي تۋريستەرىنىڭ نازارىن وزىمىزگە اۋدارا الدىق» - دەيدى وبلىستىق تۋريزم جانە سىرتقى بايلانىستار باسقارماسىنىڭ باسشىسى جاسۇلان سارسەبايەۆ.
قىتايلىق بلوگەرلەردىڭ اراسىندا ءوز ەلىنەن بولەك الەم جۇرتشىلىعىنا تانىلىپ ۇلگەرگەندەرى دە بار. ليۋ ۆەنۆەن «ترانسفورمەر» فيلمىندە ەپيزودتىق رولگە تۇسكەن ەكەن.
مەيماندار شىعىس قازاقستاننىڭ تابيعاتى مەن تاريحى وتە قىزىقتى بولعانىمەن، سەرۆيس جاعىن دامىتۋ كەرەك دەگەن ۇسىنىس ايتتى. ولار اسىرەسە اقىسىز ينتەرنەت ۇسىنۋ، اعىلشىن تىلىندە اقپارات بەرۋ، جول تالعامايتىن كولىكتەردى جالعا بەرۋ، اۆتوموبيل جولدارىن جاقسارتۋ سياقتى ماسەلەلەرگە ەرەكشە توقتالدى.
اۆتور: ەسىمجان ناقتىباي