15:49, 17 - تامىز 2018 | GMT +6
قىتايدا تۇراتىن ءۇش قانداسىمىز ازيادا ويىندارىندا باق سىنايدى
استانا. قازاقپارات - يندونەزيا استاناسى دجاكارتادا وتەتىن ХVIII جازعى ازيا ويىندارىندا قىتايدا تۇراتىن ءۇش قانداسىمىز اتالعان ەلدىڭ اتىنان سىنعا تۇسەدى، دەپ حابارلايدى قازاقپارات ءتىلشىسى.
بۇل تۋرالى قىتايلىق ب ا ق وكىلدەرى ءمالىم ەتتى.
ايتالىق ەركىن كۇرەس تۇرىنەن 65 كەلى سالماق دارەجەسىندە ەرلانبەك كاتەي ۇلى سىنعا تۇسەدى. ول وسىدان ءتورت جىل بۇرىن وڭتۇستىك كورەيانىڭ ينچحون قالاسىندا وتكەن ازيا ويىندارىندا قولا مەدال جەڭىپ العان بولاتىن. سونداي- اق، قىتاي قۇراماسىنىڭ قاتارىندا ريو- دە- جانەيرو وليمپياداسىنا قاتىسقان.
ەكىنشى قازاق سپورتشىنىڭ ەسىمى - ءۋاليحان سەرىك ۇلى. ول دجاكارتادا گرەك- ريم كۇرەسىنەن باق سىنايدى. ءۋاليحان سەرىك ۇلى 59 كەلى سالماقتا قىتايدىڭ ىشكى بىرىنشىلىگىندە ەكى مارتە قولا جۇلدەگەر اتانعان. ال ءۇشىنشى قانداسىمىز - بوكسشى توقتاربەك تاڭاتقان ۇلى. ول ازيا ويىندارىندا 75 كەلى سالماقتا شارشى الاڭعا شىعادى.