گولوۆكيننىڭ باپكەرى تورەشىلەردىڭ ادىلەتسىزدىگى تۋرالى: قولىمىزدان بوكستاسۋ عانا كەلەدى

استانا. قازاقپارات - قازاقستاندىق بوكسشى گەننادي گولوۆكيننىڭ باپكەرى ابەل سانچەس مەكسيكالىق ساۋل الۆارەسپەن وتەتىن قارىمتا كەزدەسۋگە تورەشىلەردىڭ ىقپالىن تيگىزە الاتىنىن جوققا شىعارمايدى، دەپ حابارلايدى Sports.kz.

«بۇل گولوۆكيننىڭ مانسابىنداعى العاشقى رەماتچ. ءوزى جاقسى تانيتىن بوكسشىمەن كەزدەسكەلى تۇر. تورەشىلەر قايتادان قاتەلىك جىبەرسە، بوكسقا نۇقسان كەلەدى. تاعى دا بارلىعىن قۇرتاتىن بولسا، بۇل نيەۆادا شتاتى ەكەنىن مويىنداۋدان باسقا ەشتەڭە قالمايدى. قولىمىزدان بوكستاسۋ عانا كەلەدى. بۇل جولعى كەزدەسۋدىڭ تورەشىلەرى دۇرىس تاڭدالىپ، جەكپە-جەكتى الدىن الا تولتىرىلعان ەسەپ بويىنشا ەمەس، ءوز كوزدەرىمەن كورگەندەرى ارقىلى باعالايدى دەگەن ويدامىن»، - دەدى سانچەس.

ەسكە سالايىق، «كانەلو» مەن GGG- دىڭ العاشقى ايقاسى داۋ تۋدىرىپ، سوڭىندا قارسىلاستار تەڭ تۇسكەن ەدى. ەكىنشى جەكپە-جەك 15 قىركۇيەكتە لاس-ۆەگاستەگى T- Mobile ارەناسىندا وتەتىن بولادى.