قۋاندىق بيشىمبايەۆ لەنگەر قالاسىنداعى تۇرمەگە جىبەرۋدى ءوزى سۇرادى

استانا. قازاقپارات - اتالعان تۇرمەدە اۋىر جانە اسا اۋىر قىلمىستار ءۇشىن سوتتالعاندار وتىرادى، دەپ حابارلايدى قازاقپارات ءتىلشىسى.

ق ر ءى ءى م قىلمىستىق اتقارۋ جۇيەسى كوميتەتىنىڭ باسپا ءسوز حاتشىسى عالىمجان حاسەنوۆتىڭ ايتۋىنشا، ەكس-مينيستر ءوتىنىش جازىپ، لەنگەر قالاسىنداعى تۇرمەگە جىبەرۋدى سۇرادى. اتالعان ماسەلە قىلمىستىق اتقارۋ كودەكسىنىڭ 88-بابىندا كورسەتىلگەن. وعان سايكەس، سوتتالعان ازامات الەۋمەتتىك پايدالى قارىم-قاتىناستى ۇستايمىن دەپ، ناقتى ءبىر تۇرمەگە جىبەرۋدى سۇراي الادى. ق. بيشىمبايەۆ تۋرا سونداي ءوتىنىش جازىپ، لەنگەر جاقتا تۋعان-تۋىستارىنىڭ تۇراتىنىن كورسەتكەن.

«وسىعان بايلانىستى سوتتالعان بيشىمبايەۆ 5- شىلدەدەن باستاپ تۇركىستان وبلىسى لەنگەر قالاسىنداعى ي چ 167/9 مەكەمەسىندە ءوز جازاسىن وتەپ ءجۇر. ول - قاتاڭ رەجيمدەگى كولونيا. شامامەن، 500 ادامعا ارنالعان. ونداي تۇرمەگە اۋىر جانە اسا اۋىر قىلمىستار ءۇشىن العاش رەت سوتتالعانداردى جىبەرەدى»، - دەدى ع. حاسەنوۆ قازاقپارات تىلشىسىنە بەرگەن سۇحباتىندا.

ونىڭ ايتۋىنشا، قازىرگى كەزدە ول كولونيادا 400 دەن استام ادام وتىر.

«قۋاندىق بيشىمبايەۆقا ەشقانداي جەڭىلدىك جاسالمايدى. ءبىر ورىندى كامەرا دا بولمايدى. ول بارلىق سوتتالعاندارمەن بىرگە جاتادى»، - دەپ اتاپ كورسەتتى كوميتەتتىڭ باسپا ءسوز حاتشىسى.