قازاقستاندا وقۋشىلارعا جاڭا اس ءمازىرى بەكىتىلدى: اسحانالاردا قانداي تاعام تۇرلەرى بەرىلەدى

None
None
 استانا. قازاقپارات - قازاقستاندىق وقۋشىلار ءۇشىن ءتورت اپتاعا ەسەپتەلگەن اس ءمازىرى جاسالدى.

جاڭا ءمازىر ساراپشىلاردىڭ كەڭەسىمەن دايىندالعان. وندا ءار كۇنگە ارنالعان ءتۇرلى تاعامدار جانە ۆيتاميندەر مەن مينەرالداردىڭ بارلىق قاجەتتى تۇرلەرى بولۋى كەرەك، دەپ جازادى Stan.kz اقپاراتتىق اگەنتتىگى.

«قازاقستاندا العاش رەت وقۋشىلارعا ارنالعان دۇرىس تاماقتانۋدىڭ ءبىرىڭعاي ستاندارتى ازىرلەندى. ءتورت اپتالىق ءمازىردى قازاق تاعامتانۋ اكادەمياسى «سالاۋاتتى تاماقتانۋ ۇلتتىق ورتالىعىمەن» بىرلەسىپ جاسادى»، - دەپ حابارلادى قالالىق دەنساۋلىق ساقتاۋ دەپارتامەنتىنىڭ باسشىسى ايزات مولداعاسىموۆا بريفينگ بارىسىندا.

ونىڭ ايتۋىنشا، جاڭا ستاندارتتار بالالاردىڭ دەنساۋلىعىن نىعايتۋعا، سونداي- اق وقۋشىلاردىڭ تاماقتانۋىنا ارنالعان ءبىرىڭعاي تالاپتاردى بەلگىلەۋگە ارنالعان.

قازاقستاندا ماقۇلدانعان تاماقتانۋ راتسيونى، ياعني ءتورت اپتالىق ءمازىر جاس ەرەكشەلىگى بويىنشا ءۇش توپقا بولىنەدى: 7-10 جاسقا دەيىنگى بالالارعا - 840 ككال، 11-14 جاستاعىلارعا - 951 ككال جانە 15-18 جاستاعى وقۋشىلارعا - 1020 ككال.

سونىمەن قاتار، ءمازىردى ازىرلەۋشىلەر بالالاردىڭ مەكتەپتە قانشا ۋاقىت جۇرەتىن جانە ولاردىڭ جاسىنا ساي قانداي ۆيتاميندەر مەن مينەرالداردى قاجەت ەتەتىنىن ەسكەردى.

مولداعاسىموۆانىڭ ايتۋىنشا، ءمازىر ءار مەزگىلگە ارنالىپ جاسالىنعان. دەمەك، بالالارعا ارنالعان جاڭا مازىردە ءار مەزگىلدە ءتۇرلى تاعامدار بەرىلەدى.

«ءبىرىڭعاي ستاندارتتى مازىردەن قۋىرىلعان تاعامدار، وتكىر دامدەۋىشتەر - قىشا، سىركە سۋى، جۇگەرى جانە بۇرىشتىڭ بارلىق تۇرلەرى تولىعىمەن الىنىپ تاستالدى»، - دەپ اتاپ ءوتتى ءبولىم باسشىسى.

سونىمەن، تاماقتانۋ راتسيونىندا وقۋشىلارعا اپتاسىنا ەكى رەت -  بال، ءسۇت، ءۇش رەت -  ىرىمشىك پەن سالات بەرۋ قاراستىرىلعان. سونداي-اق، ءار بەيسەنبى سايىن «بالىقتان ازىرلەگەن تاعام» بەرىلەدى. كۇن سايىن ءار ءتۇرلى سورپا جانە ەكىنشى تاعامعا كۇنىنە سيىر مەن تاۋىق ەتىنەن جاسالعان تاماق ۇسىنىلادى.

سوڭعى جاڭالىقتار