استانادا سپورت مەكتەپتەرىنە بالالار قابىلداۋ باستالدى

استانا. قازاقپارات - استانادا بالالاردى سپورت مەكتەپتەرىنە قابىلداۋ بويىنشا اشىق ەسىك كۇنى وتەدى، دەپ حابارلايدى قازاقپارات قالا اكىمدىگىنىڭ سايتىنا سىلتەمە جاساپ.

18 -تامىزدا 10-نان كەشكى 17-گە دەيىن «بارىس» سپورت كەشەنىندە (مۇڭايتپاسوۆ كوشەسى 9، «قازاقستان» س ك جانىندا) اشىق ەسىك كۇنى وتەدى. شاراعا كەلۋشىلەر استانا قالاسىنىڭ سپورت مەكتەپتەرىنە بالالاردى قابىلداۋ تۋرالى اقپارات الا الادى. اتالعان شارا قازاقستاندا تامىز ايىنىڭ ءۇشىنشى جەكسەنبىسىندە اتالىپ وتىلەتىن سپورت كۇنى قارساڭىندا ۇيىمداستىرىلادى.

استانا قالاسىنىڭ مادەنيەت جانە سپورت باسقارماسى بارلىق ەلوردا تۇرعىندارىن اشىق ەسىك كۇنى شاراسىنا شاقىرادى. مۇندا استانانىڭ سپورت مەكتەپتەرىنە بالالاردى قابىلداۋ شارتتارى، قاجەتتى قۇجاتتار ءتىزىمى تۋرالى اقپاراتتار بەرىلەدى.

استانا قالاسى اكىمدىگىنىڭ بالالار- جاسوسپىرىمدەر سپورت مەكتەپتەرىنىڭ جانە سپورت تۇرلەرىنىڭ تولىق ءتىزىمى تىركەلگەن.

ەلوردانىڭ وليمپيادالىق رەزەرۆتەگى مەكتەپتەرىندەگى مەملەكەتتىك سپورتتىق سەكسيالارعا قابىلداۋ جىل سايىن تامىز- قىركۇيەك ايلارىندا جۇرگىزىلەدى. قازىرگى كەزدە استانادا كىشكەنتاي استانالىقتار ءۇشىن 12 مەكەمە جۇمىس ىستەيدى، وندا 60-تان اسا سپورت تۇرىنەن سپورتشىلار دايىندالادى. سونىمەن قاتار، 17 سپورت تۇرىنەن مۇمكىندىگى شەكتەۋلى بالالار ءبىلىم الۋدا. اتالعان مەكتەپتەردە بالالار اقىسىز نەگىزدە وقىتىلادى.