قاراعاندىدا ون ەكى ۇزدىك تەحنيكالىق جوبا تانىستىرىلدى

قاراعاندى. قازاقپارات - قاراعاندىدا «سيفرلىق قازاقستان» مەملەكەتتىك جوباسى اياسىندا سيفرلاندىرۋ كۇنى ۇيىمداستىرىلدى، دەپ حابارلايدى قازاقپارات ءتىلشىسى وبلىستىق اكىمدىكتىڭ باسپا ءسوز قىزمەتىنە سىلتەمە جاساپ.

شارا قاراعاندى وبلىسى اكىمدىگىنىڭ قولداۋىمەن ءوتتى. باعدارلاما «سيفرلاندىرۋ ەكونوميكانى دامىتۋدىڭ درايۆەرى ىسپەتتەس» اتتى دوڭگەلەك ۇستەلدەن، وتاندىق IT- جوبالاردىڭ كورمەسىنەن جانە «SmartcityKaraganda» حاكاتونى سىندى ءۇش بلوكتان تۇردى.

سونىمەن قاتار، ن. ءابدىروۆ اتىنداعى سپورت سارايىندا وتاندىق IT- جوبالاردىڭ كورمەسى ءوتتى.

«مۇندا جالپى 12 جوبا تانىستىرىلدى. ولار دەنساۋلىق ساقتاۋ، ءبىلىم، قوعامدىق ءتارتىپتى قورعاۋ جانە ت. ب. سالالاردا جۇزەگە اسىپ ۇلگەرگەن. جوبالاردى تانىتۋ، سونداي-اق، سيفرلىق تەحنولوگيالاردى ەنگىزۋ ءىسى بويىنشا كۇشىمىزدى بىرىكتىرۋ كورمەنىڭ ماقساتى بولماق»، - دەدى قاراعاندى وبلىسىنىڭ اقپاراتتاندىرۋ، مەملەكەتتىك قىزمەتتى كورسەتۋ جانە مۇراعاتتار باسقارماسىنىڭ باسشىسى رۇستەم بايجانوۆ.

«قازاق تەلەكوم» كومپانياسى بيزنەس ءۇشىن IT- شەشىمدەر جيىنتىعىن، سونداي-اق، قۇقىققورعاۋ ورگاندارىنا، جەرگىلىكتى اتقارۋشى بيلىككە، ءبىلىم مەكەمەلەرىنە ارنالعان بەينەباقىلاۋ قىزمەتتەرىن ۇسىنادى.

«پەرسپەكتيۆا» عىلىمي- وندىرىستىك بىرلەستىگى» ج ش س قاۋىپسىزدىكتى قامتاماسىز ەتۋ سالاسىنداعى جاڭا جوبالارىن تانىستىردى.

قازىرگى ۋاقىتتا قاراعاندى بويىنشا 4 مىڭنان استام بەينەكامەرا ورناتىلعان. ولاردىڭ 1248 سى - كوشەدەگى بەينەباقىلاۋ، 3 144 كامەرا ءبىلىم نىساندارىندا ورناتىلعان.

استانالىق «ساپا تەلەمەد» كاسىپورنى ەلەكتروكارديوگرافيا تەلەمەترياسى جۇيەسىن ۇسىندى. جوبا قاراعاندى وبلىستىق كارديوحيرۋرگيالىق اۋرۋحانامەن بىرلەسىپ جۇزەگە اسۋدا. بۇل جۇيەمەن وبلىستىڭ 70 مەديتسينالىق ۇيىمى جۇمىس جاسايدى.

سيفرلاندىرۋ كۇنىن «اقىلدى قالا» سالاسىنداعى جوبالاردى دامىتۋعا باعىتتالعان حاكاتون تۇيىندەيدى. ۇيىمداستىرۋشىلار كەلەشەكتە جۇزەگە اساتىن قىزىقتىرارلىق يدەيالاردى كۇتەدى. حاكاتوننىڭ جالپى سىياقى قورى 1 ميلليون تەڭگەنى قۇرايدى.